«Barselona» düzüminde türkmen futbolçysy çykyş eden topary ýeňip bilmedi
Habar beriş serişdelerinde şu ýylyň tomsunda ABŞ-da «Real» bilen «Barselonanyň» duşuşjakdygy hakynda habar peýda boldy. «El-klasiko» 29-njy iýulda Maýaminiň «Hard Rok-stedium» stadionynda geçiriler. «Barselona» bilen «Realyň» 1991-nji ýyldan bäri ilkinji gezek ýoldaşlyk duşuşygynda ýüzbe-ýüz bolýandygy gyzyklydyr. Ýöne has gyzykly bir maglumatam bar. Ol bolsa bir gezek türkmen futbolçysynyň «Barselonanyň» garşysyna meýdança çykanlygydyr. Biz şu gün şol futbolçy, ýagny Goçguly Goçgulyýew hakynda gürrüň bereris.
Özbegistanyň 7 sapar çempiony
Türkmen futbolynyň baýdakgöterijisi hasaplanan «Köpetdagyň» goragçysy hökmünde meýdança çykýan wagtlary Goçguly Goçgulyýewe Gazagystandan çakylyk gelýär. 2001-nji ýylda Gazagystanyň «Irtyşynda» çykyş edýär. 2002-nji ýyldan Daşkendiň «Pahtakorynyň» düzüminde Özbegistanyň çempionatyndaky ilkinji ädimlerini ädip başlaýar. Bu ýerde 4 sapar (2002, 2003, 2004, 2005) Özbegistanyň çempiony bolansoň, 2006-njy ýylda Gazagystanyň «Kaýratyna» geçýär. Gazagystanyň çempionatynyň birinji ýarymynda oýnap, 2007-nji ýyldaky möwsümiň ikinji aýlawynda Özbegistana gaýdyp gelýär. Bu ýerde 2010-njy ýyla çenli çykyş edip, «Bunýodkor» bilen ýene-de 3 gezek (2008, 2009, 2010) Özbegistanyň çempionatynyň altyn medalyna mynasyp bolýar.
Dünýä çempiony bilen bir toparda
Goçguly Goçgulyýewe türkmen futbolçylarynyň arasynda ilkinji bolup, dünýä çempiony bilen bir toparda oýnamak bagty miýesser etdi. Ykbal ony 1999-njy ýylda «Altyn pökgi» baýragyna, 2002-nji ýylda Braziliýanyň düzüminde dünýä çempiony bolan Riwaldo bilen duşurdy. Goçguly «Bunýodkorda» oýnaýan mahaly meşhur Riwaldo Gresiýanyň AEK toparyndan Özbegistanyň klubyna geçipdi. Olaryň ikisi-de «Bunýodkorda» 3 sapar Özbegistanyň çempiony boldular.
«Barselona» bilen duşuşyk
2009-njy ýylyň fewralynda «Bunýodkor» Barselona şäherinde okuw-türgenleşik işlerini geçirdi. Onuň dowamynda bolsa daşkentliler Ispaniýanyň çempionatynyň öňdebaryjy klublarynyň biri hasaplanýan «Barselona» bilen ýoldaşlyk duşuşygyny geçirdi. Özbegistanyň çempionynyň Ýewropanyň öňdebaryjy topary bilen guran duşuşygy «Barselonanyň» ikinji stadiony «Miniestadide» oýnaldy. Şol taryhy duşuşykda «Bunýodkoryň» ýolbaşçylary duşuşygyň her ýarymynda aýratyn alnan düzümi meýdança goýbermek bilen ähli futbolçylaryna meşhur toparyň garşysyna meýdança çykmaga mümkinçilik döretdi. «Bunýodkoryň» türkmenistanly legioneri esasy düzüm bilen birlikde duşuşygyň birinji ýarymynda meýdança çykdy. Şol oýun bolsa 1:1 hasabynda deňme-deňlikde tamamlandy.
Hojaberdi APBAÝEW
