Serdar Berdimuhamedow Saud Arabystanyna resmi sapar bilen barar
Duşenbe güni iki ýurduň Daşary işler ministrleri telefon arkaly Türkmenistanyň Prezidentiniň Saud Arabystanyna boljak resmi saparyna taýýarlygyň çäklerinde ikitaraplaýyn çäreleriň guramaçylyk işlerini ara alyp maslahatlaşdylar.
Raşid Meredow we onuň kärdeşi Faýsal bin Farhan Al Saud şu aýda Aşgabatda Saud Arabystanynyň Daşary işler ministriniň orunbasarynyň gatnaşmagynda syýasy geňeşmeleriň geçirilmegini, ýylyň ikinji ýarymynda bolsa, Er-Riýadda söwda-ykdysady hyzmatdaşlygyň hökümetara toparynyň mejlisiniň geçirilmegini ylalaşdylar.
– Telefon arkaly söhbetdeşligiň dowamynda bu çäreler Türkmenistanyň Prezidenti Serdar Berdimuhamedowyň Saud Arabystany Patyşalygyna boljak resmi saparyna taýýarlygyň çäklerinde geçiriljekdigi bellenip geçildi – diýlip, Türkmenistanyň Daşary işler ministrliginiň habarynda aýdylýar.
Meredow iýun aýynyň 1-ne, 2-sine Prezident Serdar Berdimuhamedowyň umra hajyny berjaý etmek üçin Saud Arabystany Patyşalygyna bolan iki günlük saparynyň ýokary guramaçylyk derejesi üçin öz kärdeşine minnetdarlyk bildirdi.
ORIENT news
