Türkmenistanyň Prezidenti RF-na saparynyň netijelerine ýokary baha berdi
Türkmenistanyň Prezidenti Serdar Berdimuhamedow Russiýa Federasiýasyna resmi saparynyň netijelerine ýokary baha berdi. Türkmen Lideri bu barada metbugat üçin beýanatda, hususan-da, şeýle diýdi:
– Biziň ikitaraplaýyn gatnaşyklarymyz barada aýtmak bilen, olaryň yzygiderli we depginli ösýändigini nygtamak isleýärin.
Bilelikdäki tagallalarymyzyň netijesinde, Türkmenistan bilen Russiýa Federasiýasynyň arasyndaky gatnaşyklar barha ösdürilýär. Olaryň tapawutly aýratynlygy deňhukuklylykdan, özara hormat goýmakdan, açyklykdan we ynanyşmakdan, iki halkyň we döwletiň arasyndaky dostlugyň hem-de hyzmatdaşlygyň has-da pugtalandyrylmagynyň möhümdigine özara düşünişilmeginden ybaratdyr.
Biziň döwletlerimiz özara söwdanyň, maýa goýumlarynyň möçberini artdyrmak, senagat, ulag, energetika, oba hojalygy ýaly ulgamlarda hem-de birnäçe beýleki ugurlarda taslamalary amala aşyrmak üçin ýeterlik kuwwata eýedir.
Soňky wagtlarda biziň medeniýet, ylym, ynsanperwer we bilim ulgamlarynda aragatnaşyklarymyz ep-esli işjeňleşdirildi. Döwletleriň ikisi-de bu işlere ählitaraplaýyn goldaw berýärler, iki ýurduň taryhyna, medeniýetine, sungatyna barha artýan özara islegi kanagatlandyrmak üçin zerur şertleri döredip, bu ugurlarda giň gatnaşyklara itergi berýärler.
ORIENT news
