Russiýa bilen Türkmenistan sanlaşdyrma pudagynda hyzmatdaşlyk barada şertnama gol çekdiler
Russiýa bilen Türkmenistan aragatnaşyk we sanly ulgam pudagynda hyzmatdaşlyk barada şertnama baglaşdylar, degişli ähtnama gol çekildi. Bu barada TASS habarlar agentligi Russiýa Federasiýasynyň Sanly ösüş, aragatnaşyk we köpçülikleýin kommunikasiýalar ministrligine salgylanmak bilen habar berýär.
– Russiýa Federasiýasynyň Sanly ösüş, aragatnaşyk we köpçülikleýin kommunikasiýalar ministriniň orunbasary Bella Çerkesowa we Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory Mämmethan Çakyýew 9-njy iýunda aragatnaşyk we maglumat tehnologiýalary pudagynda hyzmatdaşlyk barada ähtnama gol çekdiler – diýlip, habarda bellenilýär.
Duşuşygyň barşynda taraplar döwlet dolandyryşyny sanlaşdyrmak, innowasion tehnologiýalary ösdürmek, şeýle hem, radio ýygylyk spektrini sazlamak meseleleri boýunça ugurlary işläp düzmek isleglerini mälim etdiler.
Mundan başga-da, geljekde iki ýurduň IT kompaniýalarynyň gatnaşmagynda işewürler toparlarynyň iş saparlaryny guramak meýilleşdirilýär.
Hepdäniň anna güni Kremlde Russiýanyň Prezidenti Wladimir Putin Türkmenistanyň Prezidenti Serdar Berdimuhamedow bilen duşuşdy.
ORIENT news
