TDHÇMB: Türkiýäniň işewüri 20 müň tonna ECO-93 görnüşli awtoulag benzinini satyn aldy
Çarşenbe güni, 8-nji iýunda Türkmenistanyň Döwlet haryt-çig mal biržasynyň söwdalarynda türkiýeli telekeçi 20 müň tonna ECO-93 görnüşli awtoulag benzinini satyn almaga geleşik baglaşdy diýip, ORIENT-iň habarçysy habar berýär.
Harydyň bahasy ozalky geçirilen söwdalardaky bilen deňeşdirilende, 3,4% pese düşüp, bir tonnasynyň bahasy $989,50 deň boldy.Geleşigiň umumy bahasy $19,7 million barabar boldy.
Türkmenistanda ECO-93 görnüşli ekologik benzin Ahal welaýatyndaky zawodda tebigy gazdan öndürilýär. Bu kärhana tebigy gazdan senagat möçberlerinde ýangyç öndürip bilýän dünýädäki ilkinji desgadyr.
Şu gün (9-njy iýunda) söwdalara çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgydaky saýtyndan tanşyp bolar.
Oba hojalygy, senagat we kommunikasiýa, şeýle hem söwda toplumyna degişli ugurlar boýunça söwdalar duşenbe gününden-anna güni aralygynda 16:00-da, şenbe güni 11:30-da başlanýar. Nebit-gaz ugry boýunça birža söwdalary duşenbe gününden-anna güni aralygynda 16:30-da, şenbe güni 12:00-da geçirilýär.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
