Türkmen gurluşykçylary Owganystandaky demir ýol şahamçasynyň gurluşygyny dowam etdirmäge girişdiler
Türkmenistanyň inženerleri we demirýolçy hünärmenleri Akina-Andhoý demir ýol şahamçasynyň gurluşygyny dowam etdirmek üçin Owganystanyň Balh welaýatyndaky Akina şäherine geldiler. Şeýle-de, bu ýere Türkmenistandan ähli zerur bolan tehnika we enjamlar getirildi. Bu baradaky habar hepdäniň sişenbe güni Türkmenistanyň Daşary işler ministrliginiň saýtynda ýerleşdirildi.
Şahamçanyň gurluşygy “Türkmendemirýollary” agentligi bilen Owganystanyň Demir ýol ulaglary edarasynyň arasynda ozal gol çekilen ylalaşyk boýunça alnyp barylýar.
Uzynlygy 30 kilometr bolan bu demir ýol liniýasynyň gurluşygy 2019-njy ýylyň 25-nji iýulynda başlanyp, dürli sebäplere görä, şol sanda pandemiýa çäklendirmeleri zerarly, 29 kilometr 200 metr aralygy gurulypdy. Polat ýoluň galan 800 metrini bir aýyň dowamynda gurmak meýilleşdirilýär – diýip, DIM-iň berýän metbugat habarynda bellenilýär.
ORIENT news
