Azerbaýjan türkmen gazynyň Eýranyň üsti bilen goýberilmeginiň tarapdary
Azerbaýjanyň wise-premýeri Şahin Mustafaýew we Eýran Yslam Respublikasynyň Nebit ministri Jawad Owji gepleşikleriň barşynda türkmen gazyny Eýranyň üsti bilen Azerbaýjana ugratmak taslamasyny durmuşa geçirmegiň derwaýyslygyny nygtap geçdiler. Bu barada Azerbaýjanyň Ministrler Kabinetine salgylanýan AZERTAC agentligi habar berýär.
Habarda: “Nebit-gaz ulgamyndaky üstünlikli hyzmatdaşlygyň dowam etdirilýändigi bellenildi. Türkmen gazyny Eýranyň üsti bilen Azerbaýjana ugratmak taslamasyny durmuşa geçirmegiň wajyplygy nygtalyp geçildi” – diýip, aýdylýar.
Birnäçe gün öň “Armenpress” agentligi Jawad Owjiniň sözlerine salgylanmak bilen, Eýranyň türkmen gazyny swop görnüşinde Ermenistana ibermäge taýýardygyny habar berdi.
– Eýranyň Nebit ministri Jawad Owji öz ýurdunyň Ermenistana türkmen gazyny swop görnüşinde ibermäge taýýardygyny mälim etdi we gazyň Türkmenistandan Ermenistana goýberilmegi barada gepleşikleriň eýýäm başlanandygyny belläp geçdi – diýip, habarda aýdylýar.
Nury AMANOW
