Serdar Berdimuhamedow Mekkede umra hajyny berjaý etdi
Hepdäniň çarşenbe güni Saud Arabystanyna ugran Türkmenistanyň Prezidenti Serdar Berdimuhamedow yslam dünýäsiniň ruhy paýtagty – mukaddes Mekge şäherine bardy.
– Türkmen lideriniň daşary ýurda ilkinji saparynyň maksatlarynyň biri-de umra hajy däp-dessurlaryny berjaý etmekdir – diýip, Türkmenistanyň resmi metbugaty habar berýär. Döwlet baştutany bilen bilelikde, keramatly topraga zyýarat etmäge Türkmenistanyň ähli welaýatlaryndan hormatly ýaşulylar we kümüş saçly eneler hem gitdi.
Prezident Berdimuhamedowyň baştutanlygyndaky Türkmenistanyň wekiliýeti Mekkede Saud Arabystany Patyşalygynyň ýörite dini wekilleriniň ugratmagynda Al-Haram metjidine bardy. Wekiliýetiň agzalary bu ýerde öýle namazyny okadylar, soňra umra hajy däp-dessurlaryny berjaý etmäge girişdiler.
Iýun aýynyň 1-inden 2-sine geçilýän gijede mukaddes Käbäniň keramatly örtügi serpilip, Serdar Berdimuhamedowa onuň içinde namaz okamak üçin ýörite mümkinçilik döredildi. Munuň özi Türkmenistanyň Prezidentine we türkmen halkyna çuňňur hormat-sarpanyň nyşany boldy.
Şeýle-de, zyýaratyň çäklerinde türkmen liderine mukaddes Käbeden keramatly nyşan hasaplanýan teperrik gowşuryldy. Döwlet baştutany bu teperrigi Türkmenistana we onuň halkyna bildirilen çäksiz hormat hökmünde kabul edýändigini aýtdy.
ORIENT news
