Gurbanguly Berdimuhamedow Daşoguzuň täze Köpugurly hassahanasyna baryp gördi
Sişenbe güni Türkmen parlamentiniň ýokary palatasynyň başlygy Gurbanguly Berdimuhamedow Daşoguz welaýatynyň dolandyryş merkezindäki täze Köpugurly hassahana baryp gördi diýip, şu gün resmi metbugat ýazýar.
Milli Geňeşiň Halk Maslahatynyň Başlygy hassahananyň hirurgiýa operasiýalaryna taýýarlygy geçen kiçi ýaşly näsaglarynyň halyndan habar aldy, olaryň ata-eneleri bilen gürrüňdeş boldy, olaryň hassahanada ýerine ýetirilýän lukmançylyk hyzmatlary baradaky pikirleri bilen gyzyklandy.
Gurbanguly Berdimuhamedow lukmançylyk edarasynyň ikinji gatynda saglygy goraýyş we derman senagaty ministriniň orunbasary hem-de hassahananyň baş lukmany bilen bölümiň işleriniň guralyşy, lukman işgärleriň hünär derejesini ýokarlandyrmak we lukmanlaryň işine sanly tehnologiýalary ornaşdyrmak baradaky meseleleri ara alyp maslahatlaşdy.
Iş maslahatynyň dowamynda türkmen parlamentiniň ýokary palatasynyň başlygy ISO sertifikatlaryny yzygiderli täzelemegiň, hassahananyň hünärmenleriniň hünär derejesini ýokarlandyrmagyň zerurdygyna ünsi çekdi hem-de bu babatda özüniň milli saglygy goraýyş ulgamynda işlemeginiň köpýyllyk şahsy tejribesine esaslanyp, anyk tekliplerini aýtdy.
Şol gün biraz wagtdan Gurbanguly Berdimuhamedow Türkmen oba hojalyk institutyna hem baryp, ýokary okuw mekdebinde okamak üçin döredilen şertler bilen tanyşdy hem-de talyplar bilen duşuşyk geçirdi.
ORIENT news
