Merkezi Aziýanyň we Ýewropa Bileleşiginiň ýörite wekilleri Owganystandaky ýagdaýy ara alyp maslahatlaşdylar
Hepdäniň sişenbe güni Almaty şäherinde Merkezi Aziýanyň we Ýewropa Bileleşiginiň, şeýle-de BMG-niň ýörite wekilleriniň Owganystan boýunça nobatdaky duşuşygy geçirildi.
Çäräniň gün tertibine laýyklykda, duşuşykda Owganystanda sebit howpsuzlygy bilen bagly meselelere seredildi. Maslahata gatnaşyjylar Owganystany asuda, abadan, ykdysady taýdan durnukly ýurda öwürmek baradaky umumy isleglerini tassykladylar.
Taraplar Owganystana ynsanperwerlik kömegini bermekde öz milli goşantlaryny, şeýle-de ikitaraplaýyn we sebitleýin maksatnamalary bilelikde durmuşa geçirmek boýunça teklipleri jikme-jik ara alyp maslahatlaşdylar.
Duşuşykda Türkmenistanyň ýörite wekili, Türkmenistanyň Daşary işler ministriniň orunbasary Wepa Hajiýew öz çykyşynda Türkmenistanyň Owganystan bilen bagly alyp barýan syýasatynyň esasy ugurlarynyň, şol sanda durmuşa geçirilýän TOPH taslamasynyň we Owganystanyň häzirki hökümeti bilen netijeli gepleşikleriň geçirilmeginiň üstünde durup geçdi.
Ýewropa bileleşiginiň we BMG-niň wekilleri maslahata gatnaşyjylary Owganystandaky häzirki ýagdaý we owgan halkyna ynsanperwerlik we ykdysady kömeklerini bermek boýunça edilýän tagallalar bilen tanyşdyrdylar.
Duşuşyga gatnaşyjylar BMG-niň Owganystana ýardam etmek boýunça missiýasynyň mandatynyň uzaldylmagyny goldadylar.
Çärä gatnaşmagyň çäklerinde Wepa Hajiýew BMG-niň Baş sekretarynyň Owganystan boýunça Ýörite wekili, BMG-niň Owganystana ýardam bermek boýunça missiýasynyň (UNAMA) ýolbaşçysy Debora Laýons bilen duşuşdy. Taraplar Owganystana ýardam bermek boýunça halkara we ikitaraplaýyn tagallalar boýunça pikir alyşdylar.
ORIENT news
