Türkmenistan Türkmen halysynyň baýramyny belleýär
Türkmen halysynyň baýramy Türkmenistanda yzygider 30 ýyl bäri her ýylyň maý aýynyň soňky ýekşenbesinde bellenilýär. Baýramçylyk mynasybetli esasy dabaralar, däp boýunça, Aşgabatda geçirilýär.
Bu ýyl baýramçylyk dabarasy Türkmenistanyň Söwda-senagat edarasynyň sergi zalynda geçirildi. Bu ýerde haly we haly önümleriniň ajaýyp sergisi gurnaldy, şeýle-de dokma, söwda senagatlarynyň we halyçylyk pudagynyň ösüşine bagyşlanan sergi-ýarmarkasy geçirildi.
Sergä öz gaýtalanmajak el işleri bilen amaly-haşam sungatynyň ussatlary bolan keramikaçylar, zergärler, aýnanyň, mahmalyň ýüzüne surat çekmäge ezber nakgaşlar, milli lybaslary, ýantorbalary, üýtgeşik gurjaklary we başga-da birnäçe sungat eserlerini döredijiler hem gatnaşdy.
Ýöne serginiň esasy gahrymanlary, elbetde, türkmen halyçy gelin-gyzlarynyň elinden dörän nepisden näzik haly we haly öňümleridir.
Ekspozisiýanyň merkezi bölegini «Haly halkymyzyň milli buýsanjydyr” atly haly we haly öňümleriniň çeper döredijilik bäsleşiginiň ýeňijileri bolan naýbaşy eserler tutýar.
Olaryň arasynda halylaryň nusgawy we häzirkizaman görnüşleri, tebigatyň keşbini janlandyrýan diwarlyklar we ýadygärlik önümler bar.
Şeýle-de, birmahallar gap-gaç, egin-eşik saklamak üçin öý-goşlary hökmünde giňden ulanylan horjunlar, çuwaldyr torbalar hem bar. Bularyň barysy – “Türkmenhaly” Döwlet birleşiginiň çeper halyçylyk kärhanalarynyň halyçy zenanlarynyň ellerinden dörän ajaýyp eserlerdir.
Olar hem, müňlerçe ýyl ozal ene-mamalary kimin, el hünäriniň üýtgeşik ajaýyp nusgalaryny döredip, tutuş dünýädäki türkmen halylarynyň muşdaklaryny haýrana goýýarlar. Asyrlaryň dowamynda türkmen zenanlary halyçylyk sungatyny nesilden nesle geçirmek bilen birlikde, çeperçilik ussatlygyny we önümçilik usulyny kämilleşdiripdirler.
2019-njy ýylda türkmen halyçylyk sungatynyň ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilmegi Türkmenistanyň çeper elli halyçylarynyň ussatlygyna dünýä derejesinde goýulýan sarpadyr. Şu nukdaýnazardan, her ýyl döwlet derejesinde bellenilýän Haly baýramy türkmen halyçylyk sungatynyň milli aýratynlyklarynyň ýüze çykmagyna we ýaýbaňlanmagyna goşant goşýar.
Şu gün Aşgabatda türkmen halylaryna sarpa goýýanlaryň Bütindünýä Assosiasiýasynyň maslahaty, şeýle-de, “Türkmenhaly” Döwlet birleşiginiň iň gowy halyçylaryny sylaglamak dabarasy geçirildi. Haly sungatynyň tapawutlanan ussatlaryna “Türkmenistanyň at gazanan halyçysy” diýen hormatly atlar dakyldy.
ORIENT news
