Duşenbe şäherinde Merkezi Aziýada gaýtadan dikeldilýän energetikanyň geljegi ara alnyp maslahatlaşylar
Duşenbe şäherinde geljek hepdede, 2-4-nji iýunda “Merkezi Aziýa ýurtlarynda gaýtadan dikeldilýän energetikany ösdürmegiň geljegi” atly sebit maslahaty geçiriler.
Maslahatyň maksady Merkezi Aziýada gaýtadan dikeldilýän energetika çeşmelerini hem-de energiýa taýdan netijeliligi ösdürmäge ýardam bermekden ybarat diýip, Täjigistanyň Energetika we suw serişdeleri ministrligi resmi saýtynda habar berýär.
Forumyň gün tertibinde kununçylygy kämilleşdirmek üçin döwlet düzümlerini goldamagyň anyk çärelerini kesgitlemek; gaýtadan dikeldilýän energetika çeşmelerini ösdürmäge we maýa goýumlaryny çekmäge gönükdirilen has laýyk gelýän işewürlik-nusgalaryny tapmak; gaýtadan dikeldilýän energetika çeşmelerini öňe ilerletmegiň iň oňat halkara tejribeleri bilen tanyşmak we hyzmatdaşlyk etmek üçin çäreleri guramak ýaly wezipeler durýar.
Maslahat Täjigistanyň Energetika we suw serişdeleri ministrligi, ABŞ-nyň Halkara ösüş baradaky agentliginiň (USAID) “Merkezi Aziýanyň energetikasy” diýen taslamasy, BMG-niň Ösüş maksatnamasy (BMGÖM), Täjigistanyň gaýtadan dikeldilýän energetika assosiasiýasy hem-de “Nerui toza” YÖB tarapyndan guralýar.
Duşuşykda Gün we ýel serişdelerine baha bermek boýunça sebitiň ýurtlarynyň tejribesi çuňňur öwreniler.
Çäre gaýtadan dikeldilýän energetika çeşmelerini ulanmak boýunça bar bolan kuwwaty ösdürmek üçin bu ýurtlaryň işlerini işjeňleşdirmäge mümkinçilik berer. Mundan başga-da, duşuşyk energetika ulgamynda durnukly ösüşiň maksatlaryna ýetmek hem-de wezipelerini çözmek ugrunda tagallalary güýçlendirmek we berkitmek boýunça tejribe alyşmaga hem-de teklipleri taýýarlamaga mümkinçilik berer.
Maslahat gatnaşmaga BMGÖM-niň, USAID-iň, Bütindünýä bankynyň, AÖB-niň, ÝAÖB-niň, şeýle hem beýleki halkara we sebit guramalarynyň hem-de maliýe institutlarynyň, işewür we akademiki toparlaryň, hökümete degişli bolmadyk ekologiýa guramalarynyň, raýat jemgyýetleriniň wekilleri çagyryldy.
Ýeri gelende habar bersek, şu gün Duşenbe şäherinde 25-nji maýda açylan her ýyl geçirilýän “Suw energetikasy:Merkezi Aziýa we Hazar 2022” atly 6-njy Halkara Kongresi we sergisi ýapyldy.
ORIENT news
