Türkmenistan Gruziýa üçin nebit önümlerini esasy iberijileriň birine öwrüldi
Gruziýanyň Türkmenistandaky işleri wagtlaýyn ynanylan wekili Awtandil Napetwaridze Türkmenistanyň Gruziýa üçin nebit önümlerini esasy iberijileriň birine öwrülendigini aýtdy. Gruzin diplomatynyň Gruziýanyň döwlet Garaşsyzlygynyň gaýtadan dikeldilmeginiň 31 ýyllygyna bagyşlanylan makalasy “Neýtralnyý Turkmenistan” gazetinde çap edildi.
“Soňky ýyllarda Türkmenistanyň Gruziýa üçin nebit önümlerini esasy iberijileriň birine öwrülendigini bellemek gerek. Gruziýa 2021-nji ýylyň jemleri boýunça benziniň we dizel ýangyjynyň import edilmeginiň hemme möçberiniň 21,3 göterimini Türkmenistandan amala aşyrydy. Howa ulaglaryna niýetlenilen kerosin barada aýdylanda bolsa, bu görkeziji has-da ýokarydyr – 59,9 göterim” – diýilip, gruzin diplomatynyň makalasynda nygtalýar.
Napetwaridze makalasynda COVID-19 pandemiýasy netijesinde dünýä ykdysadyýetiniň çökgünlige düşmegi esasynda 2020-nji ýylda emele gelen ep-esli pese düşmeden soň, Gruziýa bilen Türkmenistanyň arasyndaky ikitaraplaýyn söwdanyň häzirki wagtda güýçli depginler bilen ýokarlanýandygyny belleýär. Diplomat Gruziýanyň milli statistika gullugynyň görkezijilerine görä, 2021-nji ýylyň netijeleri boýunça ondan aňyrky ýyl bilen deňeşdirilende, Gruziýa bilen Türkmenistanyň arasyndaky ikitaraplaýyn söwdanyň 2,5 esse artandygyny we pandemiýa çenli bolan 2019-njy ýylyň görkezijisinden 28 göterim ýokarlanandygyny nygtaýar.
Nury AMANOW
