Türkmenistanyň Daşary işler ministri Fransiýanyň ilçisi bilen duşuşdy
Duşenbe güni geçirilen duşuşygyň dowamynda Türkmenistanyň Daşary işler ministri Raşid Meredow Fransiýa Respublikasynyň Adatdan daşary we doly ygtyýarly ilçisi Izabel Ginel bilen ikitaraplaýyn gatnaşyklar we ýurduň Ýewropa Bileleşigi bilen özara gatnaşyklary barada pikir alyşdy. Häzirki wagtda Fransiýa Ýewropa Bileleşiginiň başlygy wezipesini eýeleýär.
Diplomatlar Türkmenistan bilen Ýewropa Bileleşiginiň özara gatnaşyklarynyň ep-esli işjeňleşdirilendigini belläp geçdiler. Hyzmatdaşlygyň ileri tutulýan ugurlary hökmünde: durnuklylyk we howpsuzlyk, ykdysady, söwda, maýa goýum, şol sanda energetiki, ulag hyzmatdaşlygy we beýleki ugurlar kesgitlenildi. Ekologiýa meselesi hem özara gyzyklanma döredýär. Bu ugurda ikitaraplaýyn bähbitli gatnaşyklary ösdürmek üçin giň mümkinçilikleriň bardygy nygtaldy.
Türkmenistanyň Daşary işler ministri we Fransiýanyň ilçisi yzygiderli häsiýetde iş gatnaşyklaryny saklamak babatynda ylalaşdylar.
ORIENT news
