Türkmenistanyň Prezidenti Gazagystanyň birinji wise-premýeri bilen hyzmatdaşlyk etmegiň meselelerini ara aylyp maslahatlaşdy
Anna güni Prezident Serdar Berdimuhamedow Gazagystanyň birinji wise-premýeri Roman Sklýar kabul etdi. Söhbetdeşlikde söwda-ykdysady we nebitgaz pudaklarynda, senagat we obasenagat toplumlarynda ikitaraplaýyn gatnaşyklaryň ileri tutulýandygy tassyklanyldy. Şeýle hem türkmen gazyny Gazagystana ibermek baradaky anyk mesele, Türkmenistanda däne saklamaga niýetlenen terminaly gurmak boýunça taslama ara alnyp maslahatlaşyldy.
Ýakynda Gazagystanyň Prezidenti Kasym-Žomart Tokaýewden Türkmenistanyň Prezidentine gelen hatda goňşy ýurduň baştutany, hususan-da, energetika, logistika, senagat we oba hojalygy ulgamlarynda bilelikdäki taslamalaryň durmuşa geçirilmeginiň ikitaraplaýyn hyzmatdaşlygy täze derejä çykarmak üçin güýçli itergi bolup biljekdigini belledi.
Kasym-Žomart Tokaýew 2021-nji ýylyň güýzünde Türkmenistana bolan saparynyň barşynda iki ýurduň Liderleriniň ýangyç-energetika toplumynda bilelikdäki taslamalaryň geljeginiň uly boljakdygy, şeýle hem türkmen-owgan serhedinde däne terminalyny gurmak barada bir pikire gelendiklerini ýatlady.
Şunuň bilen baglylykda, gazak lideri bu taslamalaryň üstünde ýokary hilli işlemek üçin premýer-ministriň birinji orunbasarynyň ýolbaşçylyk edýän wekiliýetini türkmen paýtagtyna ugradýandygyny belledi.
Aşgabada Gazagystanyň uly wekiliýetiniň gelmegi hem-de umumy meseleler bilen birlikde, bilelikdäki anyk taslamalar boýunça gepleşikleriň maksada gönükdirilen yzygiderliligi türkmen gazyny Gazagystana ibermek hem-de Türkmenistanyň çäginde galla saklamak üçin niýetlenen iri desgany gurmak boýunça ozallar göz öňünde tutulan maksatlaryň ýakyn geljekde anyk iş häsiýetine geçmegine garaşmaga mümkiniçlik berýär.
ORIENT news
