Türkmenistanyň wise-premýeri GDA-nyň hökümet baştutanlarynyň geňeşiniň mejlisine gatnaşdy
Türkmenistanyň Ministrler Kabinetiniň Başlygynyň orunbasary Muhammetdurdy Muhammedow Garaşsyz Döwletleriniň Arkalaşygynyň anna güni Gazagystanyň premýer ministri Alihan Smailowyň başlyklyk etmeginde geçirilen hökümet baştutanlarynyň geňeşiniň nobatdaky mejlisine gatnaşdy.
Şeýle hem wideomaslahat arkaly geçirilen mejlise Azerbaýjanyň hökümet baştutany Ali Asadow, Belarusyň hökümet baştutany Roman Golowçenka, Gyrgyzystanyň hökümet baştutany Akylbek Japarow, Russiýanyň hökümet baştutany Mihail Mişustin, Täjikistanyň hökümet baştutany Kohir Rasulzoda, Özbegistanyň hökümet baştutany Abdulla Aripow hem-de Ermenistanyň wise-premýeri Mger Grigorýan we GDA-nyň ýerine ýetiriji komitetiniň başlygy Sergeý Lebedew gatnaşdylar.
Mejlisiň dowamynda ýolbaşçylar ykdysady hyzmatdaşlygyň möhüm meseleleri, özara söwdanyň möçberini we onuň dwersifikasiýa ýoly bilen ösdürilmegini artyrmak, senagat kooperasiýasy hem-de GDA ýurtlarynyň bäsdeşlik artykmaçlyklarynyň mümkinçiligini ulanmak boýunça pikir alyşdylar.
Kiçi we orta telekeçiligiň subýektleriniň arasynda işewür gatnaşyklaryň ýola goýulmagyna we ösdürilmegine ýardam bermek maslahatlaşylan ýene-de bir meseleleriň biri boldy. Şeýle hem howanyň üýtgemegi we kiberhowpsuzlygynyň howplary baradaky meselelere deglip geçildi.
Mejlisiň netijeleri boýunça birnäçe resminalara, şol sanda Biologik serişdeleri alyşmak baradaky ylalaşyga, GDA gatnaşyjy döwletleriň umumy ylmy-tehnologiýa giňişligini döretmek hakynda ylalaşyga üýtgetmeleri girizmek baradaky Teswirnama, şeýle hem GDA gatnaşyjy döwletleriň Üzümçiligi we çakyr önümçiligini has-da ösdürmek boýunça hyzmatdaşlygyň konsepsiýasy hakyndaky we ony amala aşyrmak baradaky esasy çäreleriň Meýilnamasy hakyndaky, 2026-njy ýyla çenli döwür üçin Oba hojalyk maldarçylygynyň önümçiliginde genetik serişdeleriniň biologik howpsuzlygyny üpjün etmek boýunça bilelikdäki hereketleriň toplumy hakyndaky, 2026-njy ýyla çenli döwür üçin GDA gatnaşyjy döwletleriň maglumat howpsuzlygyny üpjün etmegiň strategiýasyny durmuşa geçirmek boýunça ilkinji nobatdaky çäreleriň Meýilnamasy hakyndaky, “GDA-nyň ýaşlarynyň paýtagty” atly halkara taslamasy hakyndaky, geljegi uly ylmy taslamalaryň Sanawy hakyndaky çözgütlere we beýlekilere gol çekildi.
ORIENT news
