Türkmenistanda salgyt kanunçylygy kämilleşdiriler
Penşenbe güni türkmen Hökümetiniň mejlisinde salgyt syýasaty babatda milli kanunçylygyň kämilleşdirilişi ara alnyp maslahatlaşyldy. Mejlisiň başlygy Gülşat Mämmedowanyň we Halk Maslahatynyň Başlygynyň orunbasary Kasymguly Babaýewiň Prezident Serdar Berdimuhamedowa habar berişleri ýaly, parlamentiň palatalarynda maliýe-ykdysadyýet ulgamynyň bilermenleri bilen gatnaşykda birnäçe kanunlary, şol sanda salgytlar, maýa goýumlar, kärhanalar, paýdarlar jemgyýetleri, lizingler, telekeçilik işi hakyndaky kanunlary hem-de Gümrük Kodeksini täzelemek boýunça işler alnyp barylýar.
Wise-premýer Muhammetguly Muhammedow, öz nobatynda, Ministrler Kabinetiniň geçenki mejlisinde döwlet Baştutanymyzyň milli salgyt ulgamyny döwrüň talaplaryna laýyklykda kämilleşdirmek we Türkmenistanyň Salgyt Kodeksine üýtgetmeleri we goşmaçalary girizmek boýunça teklipleri taýýarlamak babatda beren tabşyryklarynyň ýerine ýetirilişi barada hasabat berdi.
Serdar Berdimuhamedow hasabaty diňläp, ykdysadyýet we durmuş ulgamyny ösdürmekde oňyn salgyt syýasatynyň eýeleýän ornuny nygtady hem-de wise-premýere Salgyt Kodeksini döwrebaplaşdyrmak boýunça teklipleri düýpli seljermegi we olaryň üstünde ýene-de işläp, soňra Ministrler Kabinetine garamaga bermegi tabşyrdy.
Şeýle hem Muhammetguly Muhammedow Döwlet býujetiniň, durmuş-ykdysady taýdan ösüşiň esasy ugurlarynyň hem-de Türkmenistanyň 2023-nji ýyl üçin Maýa goýum maksatnamasynyň taslamalarynyň düzülişi barada hasabat berdi.
ORIENT news
