Türkmen Lideri watandaşlarymyzy Konstitusiýa we Döwlet baýdagynyň güni bilen gutlady
Türkmenistanyň Prezidenti Serdar Berdimuhamedow watandaşlarymyzy Konstitusiýanyň kabul edilmeginiň we Döwlet baýdagynyň döredilmeginiň 30 ýyllygy bilen gutlady diýip, şu gün resmi türkmen metbugaty ýazýar.
Taryh üçin gysga döwürde Türkmenistanda konstitusion gurluş kämilleşdirildi hem-de jemgyýetiň sazlaşykly we durnukly ösüşini üpjün edýän kanunlar kabul edildi diýip, döwlet Baştutany gutlagynda nygtady.
Ýurtda döwlet häkimiýet we dolandyryş edaralarynyň täze ulgamy kemala getirildi, iki palataly kanun çykaryjy täze edara – Türkmenistanyň Milli Geňeşiniň Halk Maslahaty we Mejlisi döredildi. Bularyň ählisi ösen syýasy we hukuk ulgamy bolan döwlet hökmünde ýurdumyzyň halkara abraýyny artdyrdy diýip, türkmen Lideri belledi.
Türkmenistanda Konstitusiýa we Döwlet baýdagynyň güni 18-nji maýda bellenilýär we şol gün ýurtda dynç güni diýlip yglan edildi.
Baýramçylygyň öňýanynda Aşgabatda “Türkmenistanyň Konstitusiýasyna 30 ýyl: kanunçykaryjylyk işiniň täze taryhy eýýamy we häzirki zaman tejribesi” atly ylmy-amaly maslahat geçirildi.
ORIENT news
