Lebap welaýatynda “Türkmenbaşy” bankynyň täze şahamçasy açyldy
Ýurdumyzyň Lebap welaýatynyň Köýtendag etrabynyň Magdanly şäherinde Türkmenistanyň Konstitusiýa we Döwlet baýdagynyň Gününiň öňýanynda, “Türkmenbaşy” paýdarlar-täjirçilik bankynyň bölüminiň täze edarasy dabaraly açyldy.
“Demirbetongurnama” kärhanasynyň guran iki gatly binasynda müşderilere ýokary derejede hyzmat etmek üçin hemme zerur şertleri döredildi.
Türkmenistanda “Türkmenbaşy” bankynyň jemi ýigrimi şahamçasy hereket edip, kärhanalara, döwlet edaralaryna we hususy firmalara üstünlikli hyzmat edýär. Lebap welaýatynda bankyň alty şahamçasy bolup, şolaryň ikisi Köýtendag etrabynda ýerleşýär.
Türkmenistanyň bu etraby sebitiň tebigy baýlyklaryny özleşdirmegiň hasabyna soňky ýyllarda işjeň ösüp başlady. Bu ýerde Lebabyň sement zawody, Garlykdaky dag-magdan jynslaryny baýlaşdyryjy toplum, senagat ulgamynda ýöriteleşen hususy kärhanalaryň ençemesi ulanylyşa tabşyryldy. Olaryň köpüsine “Türkmenbaşy” PTB-y hyzmat edýär.
ORIENT news
