Türkmenistanyň DIM-de ABŞ-nyň diplomatik gullugynyň baş direktory bilen duşuşyk geçirildi
Ýekşenbe güni Türkmenistanyň daşary işler ministri Raşid Meredow ABŞ-nyň Döwlet departamentiniň diplomatik gullugynyň baş direktory Kerol Peres we ABŞ-nyň döwlet sekretarynyň Günorta we Merkezi Aziýa işleri boýunça kömekçisiniň birinji orunbasary Din Tompson bilen duşuşyk geçirdi. Duşuşyga ABŞ-nyň ilçisi Mettýu Stiwen Klimou gatnaşdy.
Türkmen DIM-niň metbugat gullugynyň habar berşi ýaly, duşuşykda ikitaraplaýyn hyzmatdaşlygyň giň gerimli meselelerine garaldy, sebit we ählumumy meselelere, şol sanda howanyň üýtgemegi baradaky meselä deglip geçilip, taraplar bu babatda has işjeň hyzmatdaşlyk etmek ugrunda pikirlerini beýan etdiler.
Diplomatlar Türkmenistan bilen ABŞ-nyň arasyndaky söwda-ykdysady aragatnaşyklaryň ýagdaýyny hem-de geljegini ara alyp maslahatlaşyp, Türkmen-amerikan Işewürler geňeşiniň eýeleýän ornuny bellediler.
ORIENT news
