Hormatly Prezidentimiz Serdar Berdimuhamedow wise-premýerleriň sanlylaşdyrmak boýunça hasabatlaryny diňledi we Çakyýewe käýinç yglan edti
Türkmenistanda sanlylyaşdyrmak işini güýçlendirmek anna güni geçirilen Hökümetiň mejlisiniň esasy meselesi boldy. Prezident Serdar Berdimuhamedow sanly ulgam arkaly bu meseleler boýunça wise-premýerleriň hasabatlaryny diňledi hem-de ykdysadyýetiň pudaklarynda we döwletiň durmuşynyň beýleki ugurlarynda sanly ulgamy kemala getirmek babatda geçirlen işlere baha berdi.
Türkmenistanda 2021-2025-nji ýyllarda sanly ykdasadyýeti ösdürmegiň maksatnamasynda kanunçylyk taýdan goldamakdan başlap, tehnologiýa taýdan kämilleşdirmäge çenli toplumlaýyn çäreleri üç tapgyrda amala aşyrmak göz öňünde tutuldy. Bu wezipeleri ýerine ýetirmekde “Türkmenaragatnaşyk” agentligi esasy edara hökmünde kesgitlenildi.
Mejlisde Ministrler Kabinetiniň ýanyndaky Ulag we kommunikasiýalar agentliginiň Baş direktory Muhammethan Çakyýewiň hasabat berşi ýaly, sanlylaşdyrmak ugrunda 2022-2023-nji ýyllar aralygy öz içine alýan işleriň ikinji tapgyrynda döwlet ulgamynda maglumat-aragatnaşyk tehnologiýalaryny depginli ulanmaklyk dowam edýär, hususan-da, Türkmenistanyň döwlet hyzmatlary portalynyň mümkinçiliginiň gerimi geňeýär. Ikinji tapgyrda “Elektron hökümetiniň” doly derejede hereket edip, işläp başlamagyny ýola goýmak meýilleşdirildi.
Sanly ulgamyň giňeldilmegi bilen birlikde, kiberhowpsuzlygy üpjün etmek boýunça işler alnyp barylýar. Şunuň bilen baglylykda, Ministrler Kabinetiniň ýanynda möhüm infratrukturalarynyň obýektlerini derejelendirmek boýunça ýörite topary döretmek teklip edildi.
Serdar Berdimuhamedow bu teklibi goldap, “Aragatnaşyk liniýalaryny goramagyň kadalaryny tassyklamak hakyndaky” karara gol çekdi.
Maliýe-bank meseleleri boýunça wise-premýer Muhammetguly Muhammedow hasabatynyň dowamynda Maliýe we ykdasadyýet ministrliginde harytlary satyn almak boýunça bäsleşikleriň we döwlet emlägini hususylaşdyrmak boýunça bäsleşikli söwdalaryň sanly ulgamyny işe girizmäge taýýarlyk görlüşi barada habar berdi.
Şeýle hem ol “internet-bank” we menzilara onlaýn töleg hyzmatlarynyň ösdürilişi barada hasabat berdi, şeýle hyzmatlary ýuridik şahslar we hususy telekeçiler üçin ýene birnäçe banklar: “Halkbank”, “Daýhanbank” we “Senagat” bank alyp barýarlar.
Hormatly Prezidentimiz wise-premýere Salgyt Kodeksiniň birnäçe düzgünlerine täzeden seretmegi, galsytlaryň käbir nyrhlaryny hem-de görnüşlerini täzelemegi we bu babatda bir hepdäniň dowamynda teklipleri bermegi tabşyryp, bu ulgamda gözegçiligiň sanly tehnologiýalaryny giňden ulanmagyň zerurdygyny belledi.
Wise-premýer Şahym Abdrahmanow ýangyç-energetika toplumynyň düzümleýin edaralaryny sanlylaşdyrmagyň, şol sanda sarp edilmelere, haryt dolanyşygyna we hasaplaşyklara hem-de önümçilik işlerine sanly ulgam arkaly gözegçiligi üpjün etmek boýunça ýerine ýetirilýän işleriň barşy barada hasabat berdi.
Hökümet Baştutanynyň orunbasary Çarymyrat Purçekow gurluşyk-senagat toplumynyň pudaklary boýunça hasabat berip, olaryň işine ornaşdyrylan Diýarymyzyň senagatynyň sanly ulgamyny döretmäge mümkinçilik berýän tehnologiýarlar barada gürrüňberdi, şolar internetde maglumat beriş-mahabat işlerini we elektron söwdasyny alyp barmak arkaly ýurdumyzyň halkara bazarynda eýeleýän ornuny öňe ilerletmäge şert döredýär.
Wise-premýer Çary Gylyjow söwda ulgamynyň, dokma senagatynyň, ýurdumyzyň Senagatçylar we telekeçiler birleşmesiniň işleriniň sanlylaşdyrylyşy barada hasabat berip, bu ulgamlarda Döwlet haryt-çig mal biržasyndaky söwdalar bilen birlikde, onlaýn hyzmatlarynyň giňeldilişi barada gürrüň berdi.
Mejlisiň dowamynda wise-premýer Sapardurdy Toýlyýew bilim we ylym, saglygy goraýyş edaralarynyň düzümleriniň işiniň sanly ulgama geçirilip guralyşy barada hasabat berdi, obasenagat toplumyna gözegçilik edýän Esenmyrat Orazgeldiýew oba hojalyk pudagyndaky täze tehnologiýalar barada hasabat berdi.
Ministrler Kabinetiniň Başlygynyň orunbasary, daşary işler ministri Raşid Meredow türkmen diplomatiýasynyň işlerinde sanly tehnologiýalarynyň ulanylyşa barada hasabat berdi. Munuň şeýle bolmagyna DIM-iň merkezi dolandyryş edarasynda sanly diplomatiýa bölüminiň açylmagy, degişli işgärleri taýýarlamak we olaryň hünär derejelerini ýokarlandyrmak boýunça maksada gönükdirilen çäreler ýardam berdi. Şeýle hem ýurdumyzyň daşary syýasat edarasy tarapyndan onlaýn arkaly konsullyk hyzmatyny etmek boýunça işler alnyp barylýar.
Hormatly Prezidentimiz Serdar Berdimuhamedow ýolbaşçylaryň hasabatlaryny diňläp, ýurdumyzda sanlylaşdyrmak işleriniň bildirilýän talaplaryň derejesine laýyk gelmeýändigini nygtady. Hormatly Prezidentimiz Ulag we kommunikasiýalar agentliginiň Baş direktory Muhammethan Çakyýewiň alyp barýan işine nägilelik bildirip, käýinç yglan etdi hem-de ýagdaýlary düzetmegi talap etdi.
ORIENT news
