Aşgabatda Hazaryň durnukly ösdürilmegi boýunça halkara okuw maslahatlary geçiriler
Aşgabatda 16-njy maýdan 27-nji maý aralygynda “Hazar deňzi – durnukly ösüş we dolandyryş” atly halkara okuw maslahaty tapgyrlaýyn geçiriler. Hazar deňzi instituty (Türkmenistan) hem-de Halkara ummanlar instituty tarapyndan geçiriljek okuwlara Türkmenistanyň ugurdaş düzümleriniň hünärmenleri we Hazar deňzi ýurtlarynyň ilçihanalarynyň wekilleri gatnaşar.
Okuw maslahatlarynyň tapgyrlary deňziň ekoulgamynyň goralmagyna üns bermek bilen Hazarýaka sebitinde hyzmatdaşlygyň ösdürilmegine, kenarýaka jemgyýetçilikleriniň durnukly ösmegine, degişli gulluklaryň işgärleriniň hünär derejeleriniň ýokarlandyrylmagyna gönükdirilendir.
Okuw maslahatlarynyň geçirilmegi baradaky karara hormatly Prezidentimiz Serdar Berdimuhamedow gol çekdi. Resminama laýyklykda, Türkmenistanyň DIM-i hem-de Hazar deňzi instituty halkara derejeli degişli mazmundaky okuw çäreleriniň guramaçylygyna jogap berýärler.
ORIENT news
