Serdar Berdimuhamedow Milli olimpiýa komitetiniň başlyklygyna saýlandy
Sişenbe güni Türkmenistanyň Prezidenti Serdar Berdimuhamedow Türkmenistanyň MOK-nyň Baş assambleýasynyň mejlisinde biragyzdan Milli olimpiýa komitetiniň başlyklygyna saýlandy.
Mejlside ýurdumyzyň at gazanan tälimçisi adyna eýe bolan Serdar Berdimuhamedowyň türkmen sportunyň hem-de olimpiýa hereketiniň ösdürilmegine goşandy bellenildi.
Soňky gazanylan üstünlikleriň hatarynda 2021-nji ýylda Tokioda agyr atletikaçy gyzymyz Polina Gurýewanyň gazanan “kümüşi” – Türkmenistanyň ilkinji olimpiýa medaly bar.
Ýakynda hormatly Prezidentimiz Serdar Berdimuhamedow 2024-nji ýylda Parižde geçiriljek tomusky Olimpiýa we Paralimpiýa oýunlaryna milli ýygyndy toparymyzy taýýarlamak boýunça Guramaçylyk toparyny döretmek hakyndaky karara gol çekdi. Häzir türkmen türgenleri üçin Aşgabatda Olimpiýa şäherjiginiň hem-de Bedenterbiýe we sport institutynyň binýadynda ýygnanyşyklar guraldy.
MOK-nyň Baş assambleýasynyň mejlisinde komitetiň soňky ýyllarda alyp baran işleri barada hasabat berildi we beýleki guramaçylyk çözgütleri kabul edildi.
ORIENT news
