Türkmenistanyň Baştutany we Azerbaýjanyň ykdysadyýet ministri ulag ulgamyndaky gatnaşyklary ara alyp maslahatlaşdylar
Sişenbe güni hormatly Prezidentimiz Serdar Berdimuhamedow sapar bilen Aşgabada gelen Azerbaýjanyň ykdysadyýet ministri Mikail Jepbarow bilen duşuşdy.
Taraplar ýangyç-energetika toplumy, ulag we kommunikasiýa ýaly ulgamlary öz içine alýan söwda-ykdysady hyzmatdaşlygyň ösdürilmegini, Hazarda serhetleşýän goňşy ýurtlaryň çäk taýdan ýerleşmegi bilen şertlendirilen gatnaşyklarynyň mümkinçiligini ara alyp maslahatlaşdylar. Şundan ugur alnyp, iki ýurduň ulag ulgamlary arkaly sebitara üstaşyr ýük geçirilmeginiň artdyrylmagynda Türkmenistanyň we Azerbaýjanyň eýeleýän orny bellenildi hem-de bu ulgamda hyzmatdaşlygyň geljegi ara alnyp maslahatlaşyldy.
Nebitgaz pudagy gepleşikleriň ýene-de bir meselesi boldy. Bu ugurda hem iki döwletiň bähbidi ugrunda tagallalary birleşdirmegiň mükinçilikleri bar. Duşuşykda Türkmenistanyň we Azerbaýjanyň işewür jemgyýetçiliginiň ugurlary boýunça hem gatnaşyklary işjeňleşdirmegiň meselelerine garaldy.
Şeýle hem şol gün Mikail Jepbarow Milli Geňeşiň Halk Maslahatynyň Başlygy Gurbanguly Berdimuhamedow bilen duşuşdy. Olar parlamentara gatnaşyklarynyň ösdürilmegine, kanunçykaryjy edaralaryň derejesinde tejribäniň alşylmagyna hem-de hukuk ulgamynda geňeşmeleriň geçirilmegine esasy üns berdiler. Munuň özi söwda-ykdysady ulgamda hem türkmen-azerbaýjan gatnaşyklarynyň pugtalandyrylmagyna hyzmat eder.
ORIENT news
