Hytaý bilen Türkiýe ýaşyl energetika hyzmatdaşlygyny ara alyp maslahatlaşdy: ýurda on ýylda goşmaça 100 GW kuwwat gerek bolar
9-njy noýabrda Stambulda Hytaý–Türkiýe ýaşyl ösüş işewürlik forumy geçirildi. Oňa Hytaý Halk Respublikasynyň Başlygynyň orunbasary Han Çžen we Türkiýäniň wise-prezidenti Jewdet Ýylmaz gatnaşdylar. Taraplar gaýtadan dikeldilýän energetika, senagat we ekologiýa tehnologiýalary boýunça hyzmatdaşlygy giňeltmek meselelerini ara alyp maslahatlaşdylar.
Foruma iki ýurduň döwlet edaralarynyň we işewür toparlarynyň 300-e golaý wekili gatnaşdy. Gün tertibine pes uglerodly tehnologiýalar, döwrebap önümçilik, sanly ykdysadyýet we logistika meseleleri girizildi.
Türkiýäniň söwda ministri Ömer Bolat gaýtadan dikeldilýän energetikany, energiýany saklaýyş ulgamlaryny, elektrik ulaglaryny, energiýa netijeliligini, aýlawly ykdysadyýeti we pes uglerodly senagat tehnologiýalaryny hyzmatdaşlygyň geljegi uly ugurlary hökmünde görkezdi.
Forumyň esasy mowzuklarynyň biri Türkiýäniň energetika infrastrukturasyny döwrebaplaşdyrmak boldy.
Hytaýyň Skyworth Solar kompaniýasynyň baş direktory Sýuý Wanfeýiň aýtmagyna görä, Türkiýe ýakyn on ýylda goşmaça 100 gigawatt energetika kuwwatyny döretmeli bolar. Bu ýylda ortaça 10 gigawatt täze kuwwatyň işe girizilmegini aňladýar. Hytaý kompaniýalarynyň wekilleri energiýany saklaýyş ulgamlary, elektromobiller we pes belentlikde uçýan howa ulaglary boýunça bilelikdäki taslamalara hem gyzyklanma bildirdiler.
Arassalanan hapa suwlary gaýtadan ulanmak meselesine hem aýratyn üns berildi. China Energy Conservation and Environmental Protection Group kompaniýasynyň başlygy Lýao Szýaşen Türkiýede arassalanan hapa suwlaryň takmynan 6 göteriminiň gaýtadan ulanylýandygyny aýtdy. Onuň sözlerine görä, kompaniýa bu ugurda türk hyzmatdaşlary bilen gatnaşyklary ösdürmegi meýilleşdirýär.
Türkiýäniň ATA Holding kompaniýasynyň ýerine ýetiriji direktory Ahmet Faruk Yşyk iki ýurduň önümçilik we üpjünçilik zynjyrlarynyň arasynda hyzmatdaşlygy giňeltmek üçin uly mümkinçilikleriň bardygyny belledi. Ol kärhanalaryň birnäçe ugurda biri-biriniň mümkinçilikleriniň üstüni ýetirip biljekdigini aýtdy.
SSTV+-niň habar bermegine görä, foruma gatnaşyjylar energetika, ekologiýa tehnologiýalary we senagat boýunça bilelikdäki taslamalary giňeltmäge gyzyklanma bildirdiler. Habarda forumyň dowamynda anyk ylalaşyklara gol çekilendigi barada maglumat berilmeýär.
