Nesilleri birleşdirýän hatyra: Türkiýe Atatürki ýatlaýar
Ankaradaky Anytkabir aramgähi — Türkiýe Respublikasyny esaslandyryjy Mustafa Kemal Atatürküň jaýlanan ýeri. Photo: A.Savin, Wikipedia / Wikimedia Commons
2026-njy ýylyň 10-njy noýabrynda Türkiýede harby serkerde, milli azat ediş hereketiniň ýolbaşçysy we respublikanyň ilkinji Prezidenti Mustafa Kemal Atatürküň hatyrasy sarpalanýar.
Mustafa Kemal Atatürk 1881-nji ýylda Selanikde dünýä indi. Ol harby bilim alyp, Osmanly goşunynda gulluk etdi. Birinji jahan urşy ýyllarynda Çanakkale söweşlerindäki hyzmatlary bilen giňden tanaldy.
1919-njy ýylyň maý aýynda Samsuna gelen Mustafa Kemal milli garaşsyzlyk hereketine ýolbaşçylyk edip başlady. Erzurum we Siwas gurultaýlary, şeýle hem 1920-nji ýylyň 23-nji aprelinde Ankarada Türkiýäniň Beýik Millet Mejlisiniň açylmagy täze döwlet gurluşynyň kemala gelmeginde möhüm tapgyrlar boldy.
Garaşsyzlyk urşundan we 1923-nji ýylyň 24-nji iýulynda Lozanna parahatçylyk şertnamasynyň baglaşylmagyndan soň, şol ýylyň 29-njy oktýabrynda Türkiýe Respublikasy yglan edildi. Mustafa Kemal onuň ilkinji Prezidenti boldy. Onuň ýolbaşçylygynda döwlet dolandyryşy, bilim we ykdysadyýet ulgamlarynda özgertmeler geçirildi.
Anadolu Ajansı habarlar agentliginiň maglumatlary esasynda TRT Haber tarapyndan çap edilen makalada agentligiň milli hereket barada dünýä habar bermek maksady bilen, 1920-nji ýylyň 6-njy aprelinde Atatürküň başlangyjy boýunça döredilendigi hem ýatlanylýar.
Atatürk 1938-nji ýylyň 10-njy noýabrynda sagat 09:05-de Stambuldaky Dolmabahçe köşgünde aradan çykdy. 1953-nji ýylda onuň jesedi Ankaradaky Anytkabir aramgähine geçirildi. Bu ýer häzirki wagtda Türkiýäniň esasy milli hatyra merkezleriniň biridir.
Çeşme: TRT Haber / Anadolu Ajansı, 2026-njy ýylyň 10-njy noýabry.
