ADIPEC 2026 sergisinde Ormuz bogazyndan aýlanyp geçýän nebit geçirijisiniň taslamasy tanyşdyryldy
Energetika howpsuzlygy dünýä ykdysadyýetiniň durnuklylygyny üpjün edýän esasy şertleriň birine öwrülýär. Halkara energiýa üpjünçiliginde bökdençlikleriň ýüze çykýan döwründe ulag ugurlaryny diwersifikasiýalaşdyrmak, tehnologik innowasiýalary ösdürmek we energiýa öndürijiler bilen sarp edijileriň arasyndaky hyzmatdaşlygy berkitmek aýratyn ähmiýete eýe bolýar.
2-nji noýabrda Birleşen Arap Emirlikleriniň paýtagty Abu-Dabide ADIPEC 2026 halkara nebitgaz sergisi we maslahaty açyldy.
Bu ýylky çäre dünýäniň energetika üpjünçilik zynjyrlarynda ýüze çykan çynlakaý bökdençlikleriň şertlerinde geçirilýär.
CCTV-niň maglumatlaryna görä, fewral aýynyň ahyrynda ABŞ-nyň we Ysraýylyň Eýrana garşy harby operasiýalarynyň başlanmagyndan soň Ormuz bogazyndan geçýän deňiz gatnawy düýpli çäklendirildi.
Adaty şertlerde bu strategik deňiz ýolundan dünýä boýunça nebitiň we suwuklandyrylan tebigy gazyň umumy möçberiniň takmynan bäşden biri daşalýar.
5-nji noýabra çenli dowam etjek ADIPEC 2026 sergisi öz taryhyndaky iň iri çäre boldy. Oňa dünýäniň dürli ýurtlaryndan 2250-den gowrak kompaniýa gatnaşýar.
Gatnaşyjylar energetika pudagyndaky öňdebaryjy tehnologiýalary, innowasion işläp taýýarlamalary we energetika geçişini goldaýan täze çözgütleri görkezýärler. Sergide döwlet edaralarynyň wekilleri, iri energetika kompaniýalarynyň ýolbaşçylary, maýadarlar we tehnologiýa pudagynyň hünärmenleri duşuşýarlar.
Esasy üns energiýa üpjünçiliginiň durnuklylygyny ýokarlandyrmaga, infrastruktura taslamalaryny ösdürmäge we halkara hyzmatdaşlygynyň täze mümkinçiliklerini gözlemäge gönükdirilýär.
Şarja milli nebit korporasiýasynyň baş direktory Hamis Al Mazrui ADIPEC sergisiniň pudagyň wekillerine häzirki kynçylyklary bilelikde seljermäge we geljekdäki töwekgelçilikleri azaltmagyň strategiýalaryny işläp taýýarlamaga mümkinçilik berýändigini belledi.
Onuň aýtmagyna görä, şu ýylky serginiň esasy mowzugy energetika krizisleriniň we üpjünçilikdäki bökdençlikleriň şertlerinde durnuklylygy üpjün etmekden ybaratdyr.
Amaly çözgütleriň biri hökmünde energiýa serişdelerini daşamagyň alternatiw ugurlaryny döretmek meselesi öňe çykýar.
Hamis Al Mazrui öz kompaniýasynyň Ormuz bogazyndan aýlanyp geçýän we Oman aýlagynyň portlaryna çykýan turbageçiriji energetika geçelgesiniň üstünde işleýändigini habar berdi.
Bu ugur çig nebiti we nebit önümlerini Ormuz bogazyndan geçmezden göni Hindi ummanyna çykarmaga mümkinçilik bermelidir.
Taslamanyň maksady strategik bogazda deňiz gatnawynyň çäklendirilmegi ýa-da ýapylmagy bilen bagly töwekgelçilikleri azaltmakdyr. Sergä hytaý kompaniýalary hem gatnaşyp, energetika pudagy üçin niýetlenen tehnologiýalaryny we çözgütlerini görkezýärler.
1984-nji ýylda ilkinji gezek geçirilen ADIPEC häzirki wagtda Ýakyn Gündogaryň iň iri we täsirli hünär sergileriniň birine öwrüldi.
SSTV+-niň habar bermegine görä, Abu-Dabide geçirilýän ADIPEC 2026 sergisinde 2250-den gowrak kompaniýa ählumumy energetika howpsuzlygyny we halkara üpjünçilik zynjyrlarynyň durnuklylygyny berkitmek meselelerini ara alyp maslahatlaşýar. Üns merkezindäki çözgütleriň biri Ormuz bogazyna garaşlylygy azaltmaga gönükdirilen alternatiw energetika ulag geçelgelerini döretmekdir.
