Ştaýnmaýere Pekin uniwersitetiniň hormatly professory ady berildi
Bilim, ylym we medeni alyşmalar arasynda düşünişmezlikler bar bolan ýurtlaryň arasynda hem dialog üçin mümkinçilik döredýär. Penşenbe güni günortandan soň Germaniýanyň prezidenti Frank-Walter Ştaýnmaýer Pekin uniwersitetine baryp, çykyş etdi, talyplar bilen duşuşdy we oňa hormatly professor ady berildi. Ştaýnmaýer Hytaýyň prezidenti Si Szinpiniň çakylygy boýunça 27–31-nji oktýabr aralygynda Hytaýda döwlet saparynda bolýar.
Germaniýanyň prezidenti çykyşynda iki ýurduň özara bähbitli söwda gatnaşyklaryny ösdürmegini dowam etdirmegini we ýüze çykýan meseleleriň çözgüdini dialog arkaly gözlemegini teklip etdi. Şeýle hem ol Ýewropanyň Hytaý bilen ykdysady gatnaşyklary üzmek islemeýändigini belledi.
“Hytaý bilen Germaniýanyň arasynda köp tapawut bar, emma iki ýurduň ykdysadyýetiniň hem güýçli eksport mümkinçiliklerine daýanýandygy bizi birleşdirýär. Dünýä bazarynda üstünlik gazanmak üçin öňünden çaklap bolýan ýagdaý we ygtybarlylyk zerurdyr. Muňa diňe ähli taraplaryň hormat goýýan düzgünleri arkaly ýetip bolýar. Şonuň üçin düzgünlere esaslanýan halkara tertibini goramak we berkitmek biziň umumy jogapkärçiligimizdir hem-de öz bähbitlerimize laýyk gelýär diýip berk ynanýaryn” diýip, Ştaýnmaýer aýtdy.
Prezident uniwersitetiň çäginde stol tennisi boýunça oýna hem gatnaşdy. Hytaý bilen Germaniýanyň bu sport görnüşinde köp ýyllyk hyzmatdaşlygy bar. Iki ýurt gatnaşyklary berkitmek we tejribe alyşmak maksady bilen yzygiderli duşuşyklary geçirýär.
Pekin uniwersitetinde okaýan nemes talyplary prezidentiň saparyna oňyn garadylar. Nemes talyby Konstantin Garbers uniwersitet bilen Germaniýanyň arasyndaky çuňňur taryhy baglanyşygyň özünde aýratyn täsir galdyrandygyny aýtdy. Emeli aň boýunça gözlegçi hökmünde ol prezidentiň emeli aňyň howpsuzlygy meselelerine hem çynlakaý çemeleşýändigini eşidip, hoşal bolandygyny belledi.
Beýleki bir talyp Leander Zaýzer bu duşuşygyň özünde umyt döredendigini we Hytaý bilen Germaniýanyň arasyndaky hyzmatdaşlygy aýdyň görkezendigini aýtdy. Ol öz ýurdunyň prezidentiniň hytaýly we nemes talyplarynyň öňünde çykyş etmegine çuňňur täsirlenendigini hem-de Ştaýnmaýere hormatly professor adynyň berilmegine begenendigini belledi.
Bu Ştaýnmaýeriň sekiz ýyla golaý wagtyň dowamynda Hytaýa ilkinji saparydyr. Ol Germaniýanyň daşary işler ministri bolup işlän döwründe Hytaýa birnäçe gezek gelipdi. Pekin häzirki saparyň ikinji duralgasy boldy.
Prezident saparyna sişenbe güni Hytaýyň gündogaryndaky Anhui welaýatyndan başlady. Ol ýerde Germaniýanyň Volkswagen awtoulag öndürijisiniň ylmy-barlag we işläp taýýarlama merkezine baryp gördi. Ştaýnmaýer Hytaýda işlenip düzülen tehnologiýalaryň Germaniýa we Ýewropa üçin hem peýdaly bolup biljekdigini nygtady.
CCTV+ habar bermegine görä, Frank-Walter Ştaýnmaýeriň Pekin uniwersitetine sapary söwda hyzmatdaşlygyny, tehnologik ösüşi we Hytaý bilen Germaniýanyň gatnaşyklarynda dialogyň ähmiýetini ara alyp maslahatlaşmak üçin mümkinçilik döretdi.
