Alty ýurduň bilermenleri Hazar sebitinde suw ýetmezçiligine garşy göreş strategiýasyny işläp düzýärler
Elista şäherinde B.B.Gorodowikow adyndaky Kalmyk döwlet uniwersitetiniň binýadynda «Ählumumy özgerişler we suw ýetmezçiligi şertlerinde Hazar sebiti: başlangyçlar we durnuklylygy ýokarlandyrmagyň ýollary» atly halkara bilermenler dialogy geçirilýär. Russiýa Federasiýasynyň Ylym we ýokary bilim ministrliginiň gözegçiliginde guralan ylmy-amaly maslahaty Azerbaýjanyň, Eýranyň, Gazagystanyň, Russiýanyň, Türkmenistanyň we Özbegistanyň alymlaryny, ekologlaryny hem-de degişli ugurlaryň bilermenlerini bir ýere jemledi. Türkmenistanyň wekiliýeti halkara forumyň işine onlaýn görnüşde gatnaşýar.
Bu duşuşygyň geçirilmegi Tähranda geçirilen Hazar deňzi boýunça III ykdysady forumda döwlet Baştutanlarynyň gazanan ylalaşyklarynyň iş ýüzünde durmuşa geçirilmegidir. Suwuň azlygy we gurak sebitleriň täze şertlere uýgunlaşmagy meseleleriniň aýratynlykda däl-de, eýsem, «Demirgazyk — Günorta» halkara ulag geçelgesiniň ösdürilmegi, agrobiotehnologiýalar we ekologik howpsuzlyk bilen utgaşyklylykda ara alnyp maslahatlaşylmagy öňde duran wezipeleriň serhetüsti häsiýetini görkezýär. Hazar deňzi bitewi ekoulgam bolup durýar we goňşy döwletler bilen özara hyzmatdaşlyk hem-de tagallalaryň utgaşdyrylmagy bolmazdan kabul edilýän diňe milli derejedäki çözgütler uzak möhletli netijäni bermeýär.
Maslahatyň iş maksatnamasynyň çäklerinde geçirilýän mejlislerde suwy arassalamagyň innowasion tehnologiýalaryny ornaşdyrmak, topragyň zaýalanmagyna garşy göreşmek we Hazarýaka sebitiniň ilatynyň saglyk ýagdaýyna gözegçilik etmek meselelerine garalýar. Akademiki hyzmatdaşlyga we nesilleriň arasyndaky ylmy däpleriň dowamlylygyna aýratyn ähmiýet berilýär. Hazar uniwersitetleriniň we ylmy-barlag merkezleriniň assosiasiýasy ýaş talyp ylmy toparlary üçin ýörite talyp haklary maksatnamasynyň döredilýändigini mälim etdi. Maslahatyň netijeleri boýunça işlenip taýýarlanyljak teklipler we bilelikdäki ylmy barlaglary geçirmek baradaky ylalaşyklar biologik baýlyklary gorap saklamak hem-de tutuş Hazar basseýniniň durnukly ösüşini üpjün etmek üçin ylmy binýat bolup hyzmat eder.
