Türkmenistanyň halkara howa menzilleri hyzmatlaryň görnüşlerini we hilini ýokarlandyrýar
Türkmenistan halkara howa menzillerini döwrebaplaşdyrmak we tehniki taýdan enjamlaşdyrmak boýunça halkara hyzmatdaşlar bilen hyzmatdaşlygyny işjeňleşdirýär. Ministrler Kabinetiniň Başlygynyň orunbasary Batyr Annaýew anna güni geçirilen Hökümet mejlisinde ýerüsti hyzmatlaryň hilini ýokarlandyrmak we aeronawigasiýa hyzmatlarynyň görnüşlerini giňeltmek boýunça yzygiderli alnyp barylýan işler barada hasabat berdi.
Ýurduň transmilli howa ýollarynyň çatrygynda ýerleşýän amatly geografik ýagdaýy we iň döwrebap terminallary bilen tapawutlanýandygy sebäpli, daşary ýurt awiakompaniýalarynyň Türkmenistanyň howa menzilleriniň üsti bilen üstaşyr we yzygiderli gatnawlary amala aşyrmaga bolan gyzyklanmasy artýar. Maddy-enjamlaýyn binýady pugtalandyrmak maksatnamasy awiasiýa pudagynyň dünýäde öňdebaryjy kompaniýalary bilen hyzmatdaşlykda hyzmat ediş tehnikalarynyň we enjamlaşdyryş serişdeleriniň döwrebap standartlaryny ornaşdyrmagy göz öňünde tutýar.
