Aşgabatda halkara gurluşyk we energetika forumy geçiriler
3–5-nji noýabr aralygynda Aşgabatda «Türkmenistanyň gurluşyk, senagat, himiýa, energetika pudaklarynyň ösüşi» atly halkara sergini we maslahaty geçiriler. Bu çäre toplumyň işgärleriniň hünär baýramy mynasybetli guralýar.
Wise-premýer Baýmyrat Annammämmedow anna güni geçirilen Ministrler Kabinetiniň mejlisinde daşary ýurtlaryň iri tehnologiýa kompaniýalarynyň, ýurduň döwlet kärhanalarynyň hem-de Senagatçylar we telekeçiler birleşmesiniň agzalarynyň wekillerini bir ýere jemlejek forumyň iş maksatnamasyny we giň gerimli sergisini taýýarlamak boýunça alnyp barylýan işler barada habar berdi.
Forumyň işewürlik maksatnamasynyň çäklerinde B2B görnüşindäki gepleşikleriň tapgyryny geçirmek, energetika, himiýa senagaty, gurluşyk materiallary we ýol gurluşygy ulgamlarynda innowasion çözgütleri tanyşdyrmak, şeýle hem täze şertnamalaýyn ylalaşyklara gol çekmek göz öňünde tutulýar.
