Türkmenistanyň Maliýe we ykdysadyýet ministrligi bilen AÖB hususy işewürligi BSG-niň standartlaryna uýgunlaşdyrmak boýunça okuw seminaryny geçirdiler
Türkmenistanyň Maliýe we ykdysadyýet ministrligi Aziýanyň ösüş banky (AÖB) bilen bilelikde 21–22-nji oktýabrda Aşgabatda «Türkmenistanyň Bütindünýä Söwda Guramasyna goşulmagy: hususy pudagyň taýýarlygy, bazarlara elýeterlilik we eksport mümkinçilikleri» atly amaly okuw seminaryny geçirdi. Çärä döwlet edaralarynyň, Türkmenistanyň Senagatçylar we telekeçiler birleşmesiniň, ýerli öndürijileriniň wekilleri hem-de halkara söwda hukugy boýunça bilermenler gatnaşdylar.
Iki günlük okuw maslahatynyň esasy ünsi Bütindünýä Söwda Guramasynyň (BSG) umumy nazary ýörelgelerinden amaly ykdysady seljermä gönükdirildi. Türkmenistanyň Maliýe we ykdysadyýet ministrliginiň BSG bilen hyzmatdaşlyk bölüminiň başlygy Ylham Ýaraşowyň we AÖB-niň wekili Asad Alimiň nygtaýşy ýaly, gepleşikleriň maksady diňe bir gurama resmi taýdan goşulmak bilen çäklenmän, eýsem milli söwda ulgamyny özgertmekden, eksporty diwersifikasiýalaşdyrmakdan we türkmen öndürijileriniň bähbitlerini goramakdan ybaratdyr.
Interaktiw sapaklaryň çäklerinde AÖB-niň bilermenleri Paolo Wergano we Fabio Artuzo, şeýle hem Ilçi Žanar Aýtžan (Gazagystanyň BSG-a goşulmagy boýunça ozalky baş gepleşik geçirijisi) bilen bilelikde gatnaşyjylary iş toparlaryna bölüp, dürli ýagdaýlardan baş alyp çykmak we amaly türgenleşikleri geçirmek boýunça işleri guradylar.
Hususan-da, pudaklaryň bäsdeşlige duýgurlygyna baha bermek meselesine garaldy. Gatnaşyjylar ykdysadyýetiň dürli pudaklarynyň import bilen bagly bäsdeşlik şertlerinde näderejede gowşak bolup biljekdigini seljerdiler we daşary bazarlara çykmaga has taýýar önümçilik ugurlaryny kesgitlediler.
Ara alyp maslahatlaşmalarda nyrh däl päsgelçiliklere we bazarlara elýeterlilige hem aýratyn orun berildi. Baglaşylan ylalaşyklar boýunça kesgitlenen hem-de iş ýüzünde ulanylýan gümrük paçlarynyň möçberlerini ulanmagyň mehanizmleri, harytlaryň gelip çykyşynyň düzgünleri, şeýle hem söwdadaky tehniki päsgelçilikler, sanitariýa we fitosanitariýa çäreleri jikme-jik öwrenildi.
Gepleşikler boýunça garaýyşlary kemala getirmek meselesine hem aýratyn üns berildi. Telekeçiler geçiş döwürleriniň iň amatly möhletlerini we serişdelerden peýdalanmagyň şertlerini ylalaşmak üçin hususy pudagyň milli gepleşik toparyna nähili anyk maglumatlary we subutnamalary berip biljekdigini ara alyp maslahatlaşdylar.
Okuw maslahatynyň netijeleri boýunça AÖB-niň wekilleri (Doroteýa Lazaro we Julian Klark) goldawyň indiki tapgyrynyň meýilleşdirilýändigini habar berdiler. Ol kärhanalaryň eksport etmäge taýýarlygyny aýratynlykda anyklamak boýunça seljermäni işläp taýýarlamagy hem-de iki aýdan soň telekeçiler üçin gaýtadan gözegçilik okuwyny geçirmegi öz içine alýar.
