Hytaýyň uçýan awtoulaglary BAE-niň şäherlerinde synagdan geçiriler
Birleşen Arap Emirlikleriniň Ras Al Haýma emirligi şäher ulaglarynyň täze görnüşini ösdürmek üçin Hytaýyň uçýan awtoulag tehnologiýalaryndan peýdalanmagy meýilleşdirýär.
Sişenbe güni emirligiň wekiliýeti Guangdong welaýatynyň Guançžou şäherindäki ARIDGE kompaniýasynyň köpçülikleýin önümçilik kärhanasyna baryp gördi. Kompaniýa pes belentlikdäki hereketlilik çözgütleri we uçýan ulaglar boýunça ýöriteleşýär.
Saparyň dowamynda taraplar Land Aircraft Carrier X3-F modeliniň ilkinji howa modulyny tanyşdyrdylar. Ol Ras Al Haýmanyň ösen howa hereketliligi boýunça kadalaşdyryjy «sandbox» meýdançasynda synagdan geçiriler.
Emirlik bu synag ulgamyny geçen ýyl şahsy uçýan awtoulaglary we olara degişli tehnologiýalary barlamak üçin döretdi.
Ras Al Haýmanyň Ulag dolandyryşynyň baş direktory Ismail Hasan Al Blooşi emirligiň deňeşdirilende kiçi ölçeginiň täze tehnologiýalary synag tapgyryndan hakyky ulanyşa has çalt geçirmäge mümkinçilik berýändigini aýtdy.
Onuň sözlerine görä, Hytaý akylly hereketlilik tehnologiýalary boýunça dünýäde öňdebaryjy ýurtlaryň biri, Ras Al Haýma bolsa täze çözgütleri synagdan geçirmek we soňra has giň sebit bazaryna çykarmak üçin amatly meýdança bolup biler.
Howa modulynyň önümçilikden çykarylyş dabarasyna Ras Al Haýmanyň hökümdary we BAE-niň Ýokary Geňeşiniň agzasy şeýh Saud bin Sakr Al Kasimi hem-de ARIDGE kompaniýasynyň esaslandyryjysy Zhao Deli gatnaşdy.
Şeýh Saud emirligiň döwrebap ulag çözgütlerini ösdürmek üçin Hytaýyň senagat tejribesini we tehnologiýalaryny çekmäge gyzyklanma bildirýändigini aýtdy.
Taslama Hytaýyň pes belentlikdäki ykdysadyýetiniň tehnologiýalarynyň daşary ýurt bazarlaryna çykmagynyň has giň tendensiýasyny hem görkezýär. Bu ýagdaýda Ras Al Haýma täze tehnologiýalaryň kadalaşdyryjy synaglardan täjirçilik ulanyşyna çenli geçip biljek meýdança hökmünde görülýär.
CCTV+ habar bermegine görä, Ras Al Haýmanyň ulag edaralary bilen ARIDGE kompaniýasynyň hyzmatdaşlygy uçýan awtoulaglary hakyky şäher şertlerinde synagdan geçirmek we soňra ulanyşa girizmek maksadyny göz öňünde tutýar.
