Geýdar Aliýew adyndaky gaznasynyň wise-prezidenti Leýla Aliýewa Türkmenistana iş sapary bilen geldi
Azerbaýjan Respublikasynyň Geýdar Aliýew gaznasynyň wise-prezidenti Leýla Aliýewa iş sapary bilen Türkmenistana geldi. Aşgabat şäheriniň Halkara howa menzilinde belent mertebeli myhmany Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa mähirli garşylady. Howa menzilinde geçirilen gysga söhbetdeşlikde taraplar öňde boljak çäreleriň iki dostlukly we doganlyk halkyň has-da ýakynlaşmagyna ýardam etjekdigini bellediler.
Saparyň esasy çäreleriniň biri Arkadag şäherinde ýerleşýän Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ştab-kwartirasyna baryp görmek boldy. Bu ýerde Oguljahan Atabaýewa bilen Leýla Aliýewanyň arasynda ikitaraplaýyn duşuşyk geçirildi. Gepleşiklerde ynsanperwer gatnaşyklary ösdürmek, ýaş nesliň saglygyny goramak, inklýuziw bilimi giňeltmek we maşgalalara durmuş taýdan goldaw bermek ulgamlarynda hyzmatdaşlygy ösdürmek meseleleri ara alnyp maslahatlaşyldy.
Oguljahan Atabaýewa Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň goldaw bermeginde Azerbaýjanyň Geýdar Aliýew adyndaky gaznasy tarapyndan Aşgabatda geçirilýän «Ene — tebigat» atly halkara ekologik serginiň aýratyn ähmiýetini nygtady. Mundan ozal bu sergi Baku, Manama, London, Ženewa we Madrid şäherlerinde üstünlikli görkezildi. Sergi her bir adamyň daşky gurşawy goramaga goşýan şahsy goşandyna düşünmäge çagyrýar.
Leýla Aliýewa öz gezeginde saparyň ýokary derejede guralandygy üçin Türkmenistanyň ýolbaşçylygyna minnetdarlyk bildirdi. Geýdar Aliýew adyndaky gaznasynyň wise-prezidenti häzirki wagtda türkmen-azerbaýjan gatnaşyklarynyň iki doganlyk halkyň taryhy köklerine, medeniýetiniň, diliniň we ruhy gymmatlyklarynyň umumylygyna esaslanýan strategik hyzmatdaşlygyň nusgalyk derejesini görkezýändigini nygtady.
Saparyň maksatnamasynyň çäklerinde Leýla Aliýewa Gurbanguly Berdimuhamedow adyndaky çagalar sagaldyş-dikeldiş merkezine hem baryp gördi. Myhman bu ýerde öňdebaryjy lukmançylyk tehnologiýalaryny ulanmak arkaly çagalary bejermek we olaryň saglygyny dikeltmek üçin döredilen şertler bilen tanyşdy. Leýla Aliýewa bu ýerde bejergi alýan çagalar bilen söhbetdeş bolup, merkeziň toplumlaýyn işine ýokary baha berdi.
Günüň baý maksatnamasy täsirli medeni çäreler bilen jemlendi. Myhmanlar Arkadag şäherindäki Görogly adyndaky döwlet atçylyk sirkine ugradylar. Bu ýerde olar «Galkynyş» milli at üstündäki oýunlar toparynyň çykyşlaryna tomaşa etdiler. Şeýle hem Aşgabat şäherindäki Magtymguly adyndaky milli sazly drama teatrynda Türkmenistanyň Döwlet simfoniki orkestriniň konsertine gatnaşdylar. Konsertde türkmen we azerbaýjan kompozitorlarynyň eserleri ýaňlandy.
