Aşgabatda saglygy goraýyş, bilim we sport ulgamyna bagyşlana halkara sergisi geçirilýär
10-njy oktýabrda Türkmenistanyň Söwda-senagat edarasynda «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi we ylmy maslahat öz işine başlady. 12-nji oktýabra çenli dowam etjek bu sergi öňdebaryjy tehnologiýalary görkezmek we tejribe alyşmak maksady bilen daşary ýurt kompaniýalarynyň wekillerini, halkara bilermenleri hem-de degişli pudak edaralarynyň hünärmenlerini bir meýdançada jemledi.
Sergi jemgyýetçilik ösüşini we ilatyň ýaşaýyş derejesini kesgitleýän esasy ugurlaryň töwereginde guraldy. Saglygy goraýyş bölüminde ýokary takyklykly anyklaýyş barlaglaryna, sanly lukmançylyga, dikeldişiň öňdebaryjy tehnologiýalaryna we jemgyýetçilik saglygyny goramak boýunça çözgütlere aýratyn üns berilýär.
Bilim bölümi okuw prosesini sanlylaşdyrmagyň usullaryny, dil taýýarlygynyň häzirki zaman maksatnamalaryny we ýokary okuw mekdeplerinde ylmy ösdürmäge gönükdirilen amaly işläp taýýarlamalary öz içine alýar. Serginiň sport bölümi bolsa innowasion enjamlaşdyryş, milli ýygyndy toparlaryny iri halkara ýaryşlaryna taýýarlamagyň usullary hem-de işjeň durmuş ýörelgesini wagyz etmek meselelerini öz içine alýar.
Forumuň işewürlik maksatnamasy halkara hyzmatdaşlygyny giňeltmäge we bilelikdäki taslamalary durmuşa geçirmäge gönükdirilen bilermenler maslahatlaryny, tanyşdyryş çärelerini hem-de B2B we B2G formatlaryndaky duşuşyklary öz içine alýar. Pudagyň gerimli sergisiniň geçirilmegine guramaçylyk taýdan ýardamy “TurkmenExpo” kompaniýasy berýär.
Çäre barada has giňişleýin maglumat: https://saglyk.turkmenexpo.com)
