Microsoft Edge 155 täzelenmesi: goşmaçalary guramagyň kämilleşdirilmegi we howpsuzlygyň güýçlendirilmegi
8-nji oktýabrda Microsoft kompaniýasy Windows, macOS we Linux ulgamlary üçin meşhur Microsoft Edge brauzeriniň 155-nji wersiýasynyň nobatdaky täzelenmesini çykardy. Işläp düzüjileriň iki hepdelik çalt täzeleniş tertibine geçmegi howpsuzlyk patchlaryny we peýdaly kämilleşdirmeleri has gysga möhletde çykarmaga mümkinçilik berýär.
155-nji wersiýadaky esasy üýtgeşmeler:
• Amatly goşmaçalaryň dolandyryşy: Brauzerde sahypalary toparlara bölmek, iş giňişliklerini sazlamak we wizual bellikleri goşmak üçin mümkinçilikler giňeldildi. Bu bolsa köp sanly açyk goşmaçalar bilen işlän wagtyňyz tertibi saklamaga kömek edýär.
• Ýokarlandyrylan howpsuzlyk: Täze wersiýada Chromium taslamasyndaky gowşaklyklary düzetmek üçin iň soňky täzelenmeler, şeýle hem brauzeriň özüne degişli ýörite howpsuzlyk düzedişleri bar.
• OneAuth ulgamyna geçiş: Ulanyjy hasaplaryna girmek üçin ulanylýan awtorizasiýa ulgamy kem-kemden häzirki zaman OneAuth wersiýasyna geçirilýär. Bu bolsa ulgama girmegiň has durnukly we howpsuz bolmagyna ýardam edýär.
• Kod binýadynyň optimizasiýasy we arassalanmagy: Işläp düzüjiler web sahypalary üçin könelişen unload hadysasyny ulanmagy bes etdiler we programmanyň işleýşini çaltlandyrmak maksady bilen wideony hakyky wagt tertibinde terjime etmek funksiýasyny goldamagy bes etdiler.
Täzelenme eýýäm ýaýradylýar we durnukly kanal arkaly işleýän ähli ulanyjylaryň enjamlaryna awtomatiki usulda, fon tertibinde gurnalýar.
ORIENT
