Türkiýede tebigatyň we ekstremal dynç alşyň merkezi: Erzinjan sebiti
Şäheriň galmagal-gowgasyndan uzaklaşyp, tebigatyň asudalygyndan lezzet almagy isleýän syýahatçylar üçin Gündogar Anadolyda ýerleşýän Türkiýäniň Erzinjan şäheri ajaýyp açyş bolup durýar. Gadymy Beýik Ýüpek ýolunyň ugrunda ýerleşýän bu sebit baý taryhy mirasy we seýrek duş gelýän geologik görnüşleri bilen tapawutlanýar. Iň çuň jülgelerden başlap, suwy goýy gyzyl öwüşgine eýe bolan trawertin kölüne çenli Erzinjan işjeň dynç alyş üçin özboluşly mümkinçilikleri hödürleýär.
Erzinjanyň tebigy syýahatçylyk ugrunyň esasy nokady Ýewfrat derýasynyň jülgesinde ýerleşýän Kemaliýe şäherçesidir. Ol ÝUNESKO-nyň deslapky sanawyna girizilendir we «Cittaslow» şahadatnamasyna eýedir. Bu ýerde 500 metr beýiklikdäki gaýalaryň içinden oýulyp ýasalan, uzynlygy 7 kilometre barabar bolan meşhur emeli Daş ýol (Taş Yol) ýerleşýär. Ol dünýäniň iň haýran galdyryjy we howply awtomobil ýollarynyň biri hasaplanýar.
Sebitiň esasy göwheri — dünýäniň iň çuň jülgeleriniň biri bolan Garaňky kanýondyr (Karanlık Kanyon). Bu ýer gaýa dyrmaşmak, beýs-jamping, wingsýut bilen uçmak, şeýle hem Karasu derýasynda rafting we kanoe bilen ýüzmek üçin ajaýyp mümkinçilikleri döredýär.
Sebitiň beýleki möhüm syýahatçylyk ýerleriniň hataryna Girlewik şaglawugy (Girlevik Şelalesi) we Otlukbeli köli (Otlukbeli Gölü) girýär. Girlewik şaglawugy ýylyň ähli pasyllarynda öz gözelligi bilen haýran galdyrýar, gyşda bolsa buzdan emele gelen äpet kaskada öwrülip, buzly gaýalara dyrmaşmagy halaýanlar üçin özüne çekiji ýere öwrülýär. Otlukbeli köli özboluşly geologik gurluşy bilen tapawutlanýar: mineral çeşmeleriň suwlary gyzyl toprakdan geçip, kölüň suwuna açyk gyzylymtyl öwüşgin berýär.
Munzur (Munzur), Esenje/Keşiş (Esence/Keşiş) we Ergan (Ergan) dag gerişleri bilen gurşalan Erzinjan treking, lager gurmak, paraplanerizm we ýolsuz ýerlerde awtoulag sürmek üçin amatly şertleri hödürleýär.
Keşiş daglarynda belentlikde ýerleşýän Aýgyr krater köli (Aygır Gölü) we ajaýyp Ýedigöller köller topary ýerleşýär. Has rahat pyýada gezelençleri halaýanlar üçin Refahiýe etrabyndaky Dumanly platosy, şeýle hem üzümçilikleri we Jiminiň (Cimin) atly özboluşly üzüm sorty bilen meşhur bolan Üzümlü sebiti amatlydyr.
Gyş paslynda Erzinjan dag lyžasy bilen meşgullanýanlaryň ünsüni özüne çekýär. Munzur dag ulgamyna degişli Ergan dagy (Ergan Dağı) Türkiýäniň iň döwrebap dag lyžasy kurortlarynyň biridir. Bu ýerde lyžada, snoubordda typmak we gar üstünde ýöreýän motosikllerde gezmek üçin ýokary derejeli infrastruktura döredilendir.
Nähili barmaly: Erzinjana Stambuldan, Ankaradan, Izmirden we Antalýadan göni howa gatnawlary amala aşyrylýar. Stambuldan uçuş takmynan 2 sagat dowam edýär. Howa menzilinden şäher merkezine taksi, awtobus ýa-da kireýine alnan awtoulag bilen baryp bolýar. Mundan başga-da, Erzinjan meşhur «Gündogar ekspressi» (Doğu Ekspresi) syýahatçylyk otlusynyň esasy duralgalarynyň biridir.
Nirede galmaly: Şäherde halkara myhmanhana zynjyrlaryna degişli myhmanhanalardan başlap, amatly ýerli myhman öýlerine çenli dürli ýaşaýyş mümkinçilikleri bar.
Nämeleri dadyp görmeli: Erzinjanyň gastronomik mirasyna meşhur tulum peýniri (tulum peyniri), Jimin üzümi we Refahiýäniň baly girýär. Adaty tagamlardan guzy etinden taýýarlanylýan kelejoşy (kelecoş), şeýle hem gasefe we lýok (lek) süýjüliklerini dadyp görmek maslahat berilýär.
Özüň bilen näme alyp gaýtmak bolar: Ýerli senetçiligiň köp asyrlyk däplerini şöhlelendirýän demirden ýasalan gapy kakýan halkalary, bezegli mis gap-gaçlary we Kemaliýäniň özboluşly halylaryny ýadygärlik hökmünde alyp gaýtmak bolýar.
ORIENT
