Türkiýe täsirlerden başlanýar: Egeý kenaryndaky tagamly ertir
Türkiýäniň Egeý kenaryndaky syýahatymyzyň ilkinji, örän täsirli gününden soň ahyry Allia myhmanhanasyna geldik. Uçuşlar, gözel «Arzuwlar jülgesi» we Adatepe zeýtun ýagy muzeýi yzymyzda galdy. Otaglarymyza ýerleşip, biraz dynç aldyk, agşam bolsa bilelikde naharlandyk. Ertesi gün bizi täze maksatnama garaşýardy.
Türkmenistandan gelen žurnalistler üçin guralan bu metbugat saparyna Türkiýe Respublikasynyň ilçihanasynyň ýanyndaky Medeniýet we syýahatçylyk müdirligi, Türkiýäniň syýahatçylygy tanyşdyrmak we ösdürmek agentligi (TGA) hem-de Turkish Airlines gatnaşdy. Guramaçylaryň maksadynyň diňe taryhy ýadygärlikleri ýa-da gözel tebigaty görkezmek bilen çäklenmeýändigine gün-günden has aýdyň göz ýetirýärdik. Ýurdy onuň gündelik durmuşy, tagamlary we myhmansöýerligi arkaly hem tanamak mümkindi.
Surata düşüresiň gelýän ertir
Ertesi irden has ir turup, kärdeşlerimiz gelmezden öň restorana bardym. Türk ertirliginiň dürli görnüşlerini ähli gözelligi bilen surata düşürmek isleýärdim.
Bu ýerde nämeler ýok diýsene! Peýniriň birnäçe görnüşi, ýaşyl we gara zeýtun, täze miweler, gök önümler, hoşboý otlar, dürli ysly zatlar goşulan çorbalar, mürepbeler we süýjüler. Elbetde, ýumurtgadan, pomidordan we burçdan taýýarlanýan meşhur menemen hem bardy. Ilki ähli zady surata düşüresiň, soňra haýsydan dadyp başlajagyňy saýlasyň gelýärdi.
Emma esasy täsinlik restoranyň içinde däl-de, myhmanhananyň howlusynda, howzuň ýanynda garaşýardy.
Uçýan omlet
Ýaş aşpez myhmanlaryň öňünde omlet bişirýärdi. Islege görä peýnir, türk sujugy, gök önümler we otlar goşulýardy. Ýöne onuň ussatlygy diňe tagam bilen çäklenmeýärdi. Ol tabany çalasyn hereket etdirýärdi welin, altynsow omlet howa galyp, öwrülip, ýene-de tabanyň içine düşýärdi. Men ýylgyrman bilmedim: bu hakykatdan-da «uçýan omletdi»!
Adaty ertirligiň kiçijik tomaşa öwrülmegine syn etmek örän ýakymlydy. Syýahatymyzyň birinji bölüminde gürrüň beren Eminäniň öý tagamlaryndan soň türk myhmansöýerliginiň başga bir tarapyny — myhmanhana hyzmatyndaky ünsüň we aşpezlik ussatlygynyň ähmiýetini gördük.
TGA-nyň gatnaşmagyndaky tanyşdyryş saparlarynyň manysy hem şunda: syýahatçylyk ugrunyň keşbi sansyz täsirlerden düzülýär. Ýatda diňe şäherleriň we ýadygärlikleriň atlary däl, eýsem mähirli ýylgyryş, ýerli tagam, garaşylmadyk duşuşyk ýa-da aşpeziň kiçijik ussatlygy hem galýar. Ýöne ertirligi uzaga çekdirip bilmezdik. Gapyda eýýäm iki sany kuwwatly ýolagçy awtoulagy garaşýardy. Öňümizde Kazdaglary daglarynda jip-safari bardy. Gap-gaçlaryň sesi heniz ýatmanka, olaryň ornuny hereketlendirijileriň güwwüldisi eýeledi. Emma bu eýýäm başga bir hekaýa.
