Türkmenistanyň ýokary okuw mekdepleriniň talyplary awtorlyk hukugy boýunça bäsleşige gatnaşmaga çagyrylýar
22-nji oktýabrda Türkmen Döwlet ykdysadyýet we dolandyryş institutynda (TDYweDI) ýurdumyzyň ýokary okuw mekdepleriniň talyplarynyň arasynda awtorlyk hukugy boýunça bäsleşik geçiriler.
Intellektual bäsleşik TDYweDI-niň Ykdysadyýet we hukuk kafedrasy hem-de Tehnologiýalary we innowasiýalary goldamak boýunça Merkezi tarapyndan guralýar. Bäsleşigiň esasy maksady ýaşlaryň nazary bilimlerini we amaly başarnyklaryny çuňlaşdyrmakdan, olaryň hukuk sowatlylygyny ýokarlandyrmakdan hem-de intellektual eýeçilik ulgamynda talyplaryň arasyndaky hyzmatdaşlygy ösdürmekden ybaratdyr.
Bäsleşik türkmen dilinde, kompýuter arkaly test görnüşinde geçiriler. Gatnaşyjylar awtorlyk we gatyşyk hukuklar babatdaky kanunçylyga degişli 100 sowala 100 minudyň dowamynda jogap bermeli bolarlar. Iň ýokary netije 100 utuga deňdir. Şahsy bäsleşikde ýeňiji bolanlar we baýrakly orunlary eýelänler I, II we III derejeli diplomlar bilen sylaglanarlar.
Türkmenistanyň her bir ýokary okuw mekdebi okuw ýylyna we hünärine garamazdan, bäsleşige gatnaşmak üçin 4 adama çenli talypdan ybarat topary hödürläp biler.
Bäsleşige gatnaşmak üçin arzalar 15-nji oktýabra çenli kabul edilýär. Talyplaryň we jogapkär mugallymlaryň sanawy görkezilen elektron görnüşindäki arzany parahatdurdyev43@gmail.com elektron poçta salgysyna ibermeli.
Bäsleşige gatnaşmagyň jikme-jik düzgünleri bilen Türkmenistanyň Bilim ministrliginiň resmi internet sahypasynda tanşyp bilersiňiz.
ORIENT
