Türkmen aşpeziň Dubaýdaky restorany «Michelin» ýyldyzyna mynasyp boldy
Türkmen aşpezi Arslan Berdiýewiň Dubaýdaky Birch restorany Michelin Guide Dubai 2026 atly täze gollanmanyň netijeleri boýunça bir «Michelin» ýyldyzyna mynasyp boldy. Bu baýrak restorana 6-njy oktýabrda Dubaýda geçirilen bäşinji Michelin Guide Dubai baýrak gowşurylyş dabarasynda berildi. Gollanmanyň täze neşirine 122 restoran girizildi, Birch bolsa bir ýyldyz bilen bellenen iki täze restoranyň biri boldy.
Arslan Berdiýew üçin bu ykrar edilme taryhy Sankt-Peterburgda başlanan taslamanyň halkara derejesinde ösüşiniň nobatdaky tapgyry boldy. Birch restorany Dubaýda 2025-nji ýylyň fewral aýynda DIFC etrabynda, The Ritz-Carlton myhmanhanasynyň ýanynda açyldy.
Häzirki wagtda restoran dürli gastronomik däpleri we aşpeziň türkmen mirasynyň elementlerini özünde jemleýän döwrebap awtorlyk aşhanasyny hödürleýär. «Michelin» gollanmasy Berdiýewiň türkmen köklerini, syýahatlaryny we ýokary hilli önümler bilen alyp barýan işini aýratyn belledi.
Arslan Berdiýew asly Daşoguzdan — Türkmenistanyň demirgazyk böleginden. Onuň hünär gastronomiýasyndaky ýoly adaty bolmadyk ýagdaýda, örän ir başlandy we restoranda däl-de, başga ýerde kemala geldi. Ol 17 ýaşynda harby gulluga gitdi we şol ýerde iki ýyl gulluk etdi. Gulluk döwründe aşhanada işlemek mümkinçiligi döredi. Öz ýatlamalaryna görä, hut şol ýerde nahar bişirmek sungatyna bolan gyzyklanmasy döräp başlady.
Aşpeziň harby gulluk ýyllary bilen baglanyşykly ýatlaýan tagamlarynyň biri milli türkmen palawydyr. Berdiýew ony gullukdaşlary we ofiserler üçin taýýarlandygyny gürrüň beripdi. Onuň aýtmagyna görä, ofiserler käte öýlerine gitmezden öň onuň bişiren palawyndan dadyp görmek üçin garaşýardylar.
Soňra harby gullukdaky tejribesi hünär ýoluna öwrüldi. Gullukdan soň Berdiýew Sankt-Peterburga gitdi we aşhanada işe başlap, kem-kemden kömekçiden baş aşpez derejesine çenli ýol geçdi. 2017-nji ýylda ol topary bilen bilelikde Birch restoranyny açdy. Wagtyň geçmegi bilen bu restoran Sankt-Peterburgyň görnükli restoran taslamalarynyň birine öwrüldi. 2021-nji ýylda bolsa ol WHERETOEAT milli restoran baýragynyň wersiýasy boýunça Russiýanyň iň gowy restorany diýlip ykrar edildi.
Şeýle-de bolsa, Berdiýewiň çemeleşmesiniň özeninde diňe gymmat ýa-da seýrek önümleri ulanmak islegi durmaýar. Onuň üçin has möhümi — nahar taýýarlamagyň usuly, bişirilýän wagty we hatda iň ýönekeý önümiň hem özboluşly tagamyny açyp görkezmek başarnygydyr.
Al-Aýndan getirilýän şugundyr bu çemeleşmäniň aýdyň mysalydyr. Aşpez ony öz aşhanasynda ulanýar. Ilkibaşda adaty görünýän bu gök önüm taýýarlanyş usuly we ownuk jikme-jikliklere berilýän üns arkaly özbaşdak gastronomik önüme öwrülýär. Bu çemeleşme Birch aşhanasynyň aýratynlyklarynyň birini — önümiň daşky görnetin kaşaňlygyna däl-de, eýsem onuň mümkinçiliklerini açyp görkezmäge gönükdirilen işi — şöhlelendirýär.
Dubaýdaky restoranyň menýusynda bu filosofiýa häzirki zaman Ýewropa, Aziýa we Ýakyn Gündogar aşhanalarynyň täsirleri bilen utgaşýar. «Michelin» gollanmasy aýratyn bellenen tagamlaryň arasynda Özbegistanyň pomidorlary bilen taýýarlanan gök ýüzgüçli tunes balygyny, şugundyr we ponzu sousy bilen berilýän mermer görnüşli sygyr etini, şeýle hem kädi içlikli rawiolileri görkezýär. Açyk aşhana hem restoranyň konsepsiýasynyň möhüm bölegidir: ol myhmanlara toparyň işine syn etmäge mümkinçilik berýär.
Häzirki wagtda Birch restorany Michelin Guide 2026 gollanmasynda bir ýyldyz bilen bellenen Dubaýyň 14 restoranlarynyň hataryna girýär.
