Awazada Merkezi Aziýa döwletleriniň we Azerbaýjan Respublikasynyň döwlet Baştutanlarynyň konsultatiw duşuşygy geçirildi
«Awaza» milli syýahatçylyk zolagynda Türkmenistanyň başlyklyk etmeginde Merkezi Aziýa döwletleriniň we Azerbaýjan Respublikasynyň döwlet Baştutanlarynyň sekizinji konsultatiw duşuşygy geçirildi.
Duşuşyga Türkmenistanyň Prezidenti Serdar Berdimuhamedow, Azerbaýjan Respublikasynyň Prezidenti Ilham Aliýew, Gazagystan Respublikasynyň Prezidenti Kasym-Žomart Tokaýew, Gyrgyz Respublikasynyň Prezidenti Sadyr Žaparow, Täjigistan Respublikasynyň Prezidenti Emomali Rahmon we Özbegistan Respublikasynyň Prezidenti Şawkat Mirziýoýew gatnaşdy.
Sebit döwletleriniň Garaşsyzlygynyň 35 ýyllygynyň bellenilýän ýylynda geçirilýän sammit türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan öňe sürlen bu syýasy dialog formatynyň ýokary derejede zerurdygyny we netijeliligini görkezdi. Geçen ýyllaryň dowamynda Konsultatiw duşuşyklar diňe bir sebit derejesindäki özara pikir alyşylýan meýdança öwrülmän, eýsem Ýewraziýada parahatçylygy, durnuklylygy we ynanyşmagy pugtalandyrmaga ýardam berýän ählumumy ähmiýetli gurala öwrüldi. Türkmen tarapynyň teklibi bilen Azerbaýjanyň bu formata doly hukukly agza hökmünde resmi taýdan goşulmagy, onuň institusional ösüşindäki möhüm tapgyr boldy.
Döwlet Baştutanlarynyň üns merkezinde syýasy-diplomatik, söwda-ykdysady, ulag-logistika we medeni-ynsanperwer hyzmatdaşlygy çuňlaşdyrmak meseleleri boldy. Çykyşlarda sebitiň ägirt uly mümkinçiliklerini açyp görkezmäge gönükdirilen birnäçe strategik başlangyçlar öňe sürüldi.
Türkmenistanyň Prezidenti Serdar Berdimuhamedow Aşgabadyň köpugurly hyzmatdaşlygy mundan beýläk-de ösdürmäge, hoşniýetli goňşuçylyk gatnaşyklaryny pugtalandyrmaga we Merkezi Aziýanyň hem-de Hazar deňziniň basseýniniň tutuş giňişliginiň durnukly ösüşiniň bähbitlerine laýyk gelýän bilelikdäki infrastruktura taslamalaryny durmuşa geçirmäge ygrarlydygyny nygtady.
Gazagystanyň Prezidenti Kasym-Žomart Tokaýew sebitara söwdanyň möçberlerini artdyrmagyň we Hazaüsti halkara ulag geçelgesini ösdürmegiň zerurdygyny belledi. Şeýle hem ol haryt dolanyşygyny giňeltmek boýunça Bilelikdäki hereketleriň meýilnamasyny işläp taýýarlamagy we sebit döwletleri tarapyndan emeli aňdan jogapkärçilikli peýdalanmak hakynda Jarnamany kabul etmegi teklip etdi.
Gyrgyz Respublikasynyň Prezidenti Sadyr Žaparow özara haryt dolanyşygynyň we maýa goýumlarynyň artdyrylmagyna ünsi çekip, bitewi elektron söwda meýdançasyny döretmegi hem-de «Bir syýahat — birnäçe ýurt» ýörelgesi esasynda syýahatçylyk ugurlaryny ösdürmegi teklip etdi. Şeýle hem ol Azerbaýjany 2027-nji ýylda Konsultatiw duşuşyga başlyklygy kabul etmegi bilen gutlady.
Täjigistanyň Prezidenti Emomali Rahmon senagat kooperasiýasyny güýçlendirmegiň we bilelikdäki önümçilik toplumlaryny döretmek maksady bilen, gatnaşyjy döwletleriň tebigy-serişde mümkinçiliklerinden has netijeli peýdalanmagyň zerurdygyny belledi.
Özbegistanyň Prezidenti Şawkat Mirziýoýew sebitde berk önümçilik zynjyrlaryny döretmäge gönükdirilen «Alty ykdysadyýet — bir önüm» konsepsiýasyny öňe sürdi. Şeýle hem ol 2027-nji ýylda Hywa şäherinde «Merkezi Aziýa — Azerbaýjan» atly giň gerimli işewürlik forumyny geçirmegi teklip etdi.
Netijeli gepleşikleriň jemleri boýunça ýurtlaryň liderleri «Merkezi Aziýa döwletleriniň we Azerbaýjan Respublikasynyň döwlet baştutanlarynyň konsultatiw duşuşygynyň düzgünleşdiriji resminamalary hakynda» Karara gol çekdiler we Bilelikdäki beýannamany kabul etdiler.
