Aşgabatda Türkmenistanyň Prezidentiniň gatnaşmagynda Hatyra güni mynasybetli çäre geçirildi
Çydamlylyk, mertlik we nesilleriň aýrylmaz baglanyşygy türkmen jemgyýetiniň ruhy daýanjy bolup, ýurduň häzirki zaman ösüşiniň gymmatlylygyny kesgitleýär. 6-njy oktýabrda — Hatyra güni Türkmenistanda 1948-nji ýylyň Aşgabat ýertitremesiniň pidalary, şeýle hem Watan goragynda söweş meýdanlarynda wepat bolan gahrymanlar hasrat bilen ýatlanyldy. Aşgabat şäherindäki «Halk hakydasy» ýadygärlikler toplumynda geçirilen gül goýmak hatyra çäresine Türkmenistanyň Prezidenti Serdar Berdimuhamedow gatnaşdy.
Ýadygärlikler toplumynyň öňündäki meýdançada Döwlet senasy we gamgyn «Keçpelek» sazy ýaňlandy. Döwlet Baştutany 1948-nji ýylyň Aşgabat ýertitremesinde gurban bolanlaryň ýagty ýadygärligini hatyralap, «Ruhy tagzym» ýadygärligine gül çemenini goýdy. Bu tebigy betbagtçylyk şäheri sähel pursatda düýbünden weýran etdi, ildeşlerimiziň müňlerçesiniň ömür tanapyny kesdi. Olaryň arasynda döwlet Baştutanynyň garry atasy, ilhalar ynsan, mugallym, tutuş ömrüni ýaşlary terbiýelemäge bagyşlan Berdimuhamet Annaýew hem bardy. Şol agyr günlerde mertlik we tutanýerlilik görkezen watandaşlarymyzyň hatyrasy häzirki wagtda Aşgabadyň döredijilikli keşbinde öz beýanyny tapýar. Paýtagtyň häzirki zaman halkara diplomatiýasynyň, hemişelik Bitaraplygyň we amatly şäher gurşawynyň merkezine öwrülmegi ata-babalaryň parahat we bagtly geljek baradaky arzuwlarynyň hasyl bolmagynyň janly nyşany bolup çykyş edýär.
Soňra Prezident Serdar Berdimuhamedow şeýle hem «Milletiň ogullary» we «Baky şöhrat» ýadygärliklerine gül çemenlerini goýdy. Bu ýadygärlikler Watanyň goragçylarynyň ölmez-ýitmez gahrymançylygynyň şanyna bina edilendir. Hatyra çäresine milli parlamentiň ýolbaşçylary, Ministrler Kabinetiniň agzalary, harby we hukuk goraýjy edaralaryň ýolbaşçylary, diplomatik korpusyň we halkara guramalaryň wekilleri, şeýle hem hormatly ýaşulular we ýaşlar gatnaşdylar.
Şol gün hatyra çäreleri Arkadag şäherinde hem-de ýurduň ähli welaýatlarynda geçirilip, sadakalar berildi we doga-dilegler edildi. Olar halkymyzy taryhy aýawly saklamaga we geljegi ynamly gurmaga bolan umumy maksada birleşdirdi.
