Serdar Berdimuhamedow bilen Ilham Aliýew hyzmatdaşlygyň ileri tutulýan ugurlaryny kesgitlediler
8-nji oktýabrda Türkmenbaşy şäheriniň «Awaza» milli syýahatçylyk zolagynda Türkmenistanyň Prezidenti Serdar Berdimuhamedow bilen Azerbaýjan Respublikasynyň Prezidenti Ilham Aliýewiň arasynda duşuşyk geçirildi. Gepleşikleriň dowamynda döwlet Baştutanlary ikitaraplaýyn we sebit hyzmatdaşlygynyň giň gerimli meselelerini ara alyp maslahatlaşdylar.
Taraplar iki ýurduň arasynda işjeň syýasy dialogyň alnyp barylýandygyna kanagatlanma bildirdiler. Geçen ýyldan bäri ýokary derejede bäş gezek saparyň amala aşyrylandygy bellenilip, munuň ikitaraplaýyn gatnaşyklaryň ýokary depgininiň aýdyň görkezijisidigi nygtaldy. Şunuň bilen baglylykda, Azerbaýjanyň Prezidenti Ilham Aliýewiň Türkmenistana, şeýle hem Türkmenistanyň Prezidenti Serdar Berdimuhamedowyň hem-de Türkmenistanyň Halk Maslahatynyň Başlygy Gurbanguly Berdimuhamedowyň Azerbaýjana amala aşyran saparlary bellenilip geçildi.
Duşuşygyň dowamynda syýasy, ykdysady, ulag, üstaşyr geçelgeler, logistika, medeniýet we ynsanperwer ugurlarda hyzmatdaşlygy giňeltmegiň geljegi esasy üns merkezinde boldy. Şeýle hem Hazar deňzi bilen bagly meseleler we halkara guramalarynyň çäklerinde özara gatnaşyklar ara alnyp maslahatlaşyldy.
Merkezi Aziýa ýurtlarynyň we Azerbaýjan Respublikasynyň döwlet Baştutanlarynyň konsultatiw duşuşygynyň gün tertibine aýratyn üns berildi. Prezident Ilham Aliýew çäräniň ýokary derejede guralandygyny belläp, onuň sebit ýurtlarynyň arasyndaky hyzmatdaşlygy mundan beýläk-de pugtalandyrmakdaky ähmiýetini nygtady.
Geçen ýylyň noýabr aýynda Azerbaýjan Merkezi Aziýa döwletleriniň Baştutanlarynyň konsultatiw duşuşyklarynyň formatyna doly hukukly gatnaşyjy hökmünde goşuldy. Bu başlangyç Türkmenistanyň Halk Maslahatynyň Başlygy Gurbanguly Berdimuhamedow tarapyndan öňe sürüldi we sebit ýurtlary tarapyndan biragyzdan goldanyldy. Prezident Ilham Aliýew bu çözgüt üçin ýene-de bir gezek minnetdarlyk bildirdi.
Duşuşygyň netijeleri boýunça döwlet Baştutanlary ikitaraplaýyn hyzmatdaşlygy ösdürmegiň geljegi hem-de özara gyzyklanma bildirilýän beýleki meseleler barada pikir alyşdylar.
