Walentina Matwiýenko GDA-nyň Awazadaky halkara forumlaryna gatnaşmak üçin Türkmenistana geldi
Türkmenistanyň Garaşsyz Döwletleriň Arkalaşygyna (GDA) başlyklyk etmeginiň çäklerinde Hazar deňziniň kenaryndaky «Awaza» milli syýahatçylyk zolagy GDA-nyň döwlet baştutanlarynyň sammitiniň öňüsyrasynda geçirilýän ýokary derejeli halkara forumlarynyň tapgyryny kabul edýär. Giň gerimli köptaraplaýyn duşuşyklara gatnaşmak üçin Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň ýolbaşçylygyndaky rus parlamentarileriniň wekiliýeti iş sapary bilen Türkmenistana geldi. Parlament toparynyň düzümine Federasiýa Geňeşiniň başlygynyň orunbasary Inna Swýatenko, degişli komitetleriň ýolbaşçylary Liliýa Gumerowa we Wladimir Jabarow hem girýär.
Çäreleriň esasy bölegi 7-nji oktýabrda Arkalaşygyň ýurtlarynyň zenanlarynyň Dialogynyň çäklerinde geçirilýän «Parahatçylygy saklamakda we durnukly ösüşe ýetmekde zenanlaryň orny» atly halkara forum bilen başlanýar. Russiýanyň parlamentiniň ýokarky palatasynyň başlygy ählihalkyň saglygy goraýyş hyzmatlary bilen gurşalmagyna we durnukly ösüş maksatlaryna bagyşlanan ýöriteleşdirilen maslahatda hem çykyş eder. Bu çäre GDA-nyň Parlamentara Assambleýasynyň, Bütindünýä Saglygy Goraýyş Guramasynyň Ýewropa sebitleýin býurosynyň we Türkmenistanyň Mejlisiniň bilelikdäki başlangyjy esasynda geçirilýär diýip, Federasiýa Geňeşiniň metbugat gullugy habar berýär. Russiýanyň wekiliýetiniň saparynyň maksatnamasynda Türkmenistanyň Mejlisiniň Başlygy Dünýägözel Gulmanowa bilen ikitaraplaýyn gepleşikleriň geçirilmegi hem göz öňünde tutulýar.
Parlamentara we tematik sessiýalaryň baý maksatnamasy başlyklygyň esasy çäresi — 9-njy oktýabrda geçiriljek GDA-nyň döwlet baştutanlarynyň sammiti üçin mazmun taýdan möhüm binýady döreder.
Hazar deňziniň kenarynda halkara duşuşyklaryň tapgyrynyň geçirilmegi Türkmenistanyň köptaraplaýyn dialogy pugtalandyrmak, ynsanperwer gatnaşyklary ösdürmek, şeýle hem sebit howpsuzlygy we durnukly ösüş bilen bagly möhüm meseleler boýunça bilelikdäki çözgütleri işläp taýýarlamak üçin netijeli meýdança hökmündäki ornunyň ýene-de bir gezek tassyklanýandygyny görkezýär.
