TDIM-niň Halkara gatnaşyklary institutynda milli mirasymyza bagyşlanan halkara maslahat geçirildi
5-nji oktýabrda Türkmenistanyň Daşary işler ministrliginiň Halkara gatnaşyklary institutynda «Milli mirasymyz – Garaşsyzlygymyzyň berk binýadydyr» atly halkara maslahat geçirildi.
Institutyň eýwanynda guralan amaly-haşam sungatynyň sergisi we çeper höwesjeňleriň, döredijilik toparynyň bu ýerde ýerine ýetiren çykyşlary myhmanlaryň ünsini çekdi.
Halkara maslahaty Halkara gatnaşyklary institutynyň «Parahatçylyk medeniýeti» atly ÝUNESKO klubynyň başlygy, Türkmenistanyň Zenanlar birleşiginiň Merkezi Geňeşiniň işjeň agzasy, uly mugallym Aýgözel Öwezowa alyp bardy.
Maslahatyň işine ýurdumyzdan institutyň rektory, pedagogika ylymlarynyň kandidaty Gülşat Ýusupowa, BMG-niň Bilim, ylym we medeniýet boýunça guramasynyň (UNESCO) işleri baradaky Türkmenistanyň Milli toparynyň jogapkär sekretary, Türkmenistanyň Gahrymany, Türkmenistanyň Adatdan daşary we Doly ygtyýarly ilçisi, filosofiýa ylymlarynyň kandidaty Çynar Rüstemowa, Türkmenistanyň Medeniýet ministrliginiň Maddy däl medeni miras müdirliginiň başlygy, sungaty-öwreniş ylymlarynyň kandidaty Jemile Gurbanowa, Türkmenistanyň Magtymguly adyndaky Ýaşlar guramasynyň Merkezi Geňeşiniň Halkara hyzmatdaşlygy bölüminiň müdiri Gurban Myradow gatnaşdylar.
Şeýle hem maslahatda Belarus Respublikasynyň ÝUNESKO Klublar Assosiasiýasynyň prezidenti, sosiologiýa ylymlarynyň kandidaty, dosent Dmitriý Subselnin, Gazagystan Respublikasynyň ÝUNESKO Klublarynyň Milli Federasiýasynyň wise-prezidenti, filosofiýa ylymlarynyň doktory Sabina Akžarowa, Gyrgyz Respublikasynyň ÝUNESKO Klublar Assosiasiýasynyň ýolbaşçysy, pedagogika ylymlarynyň doktory Dariýa Musina, ÝUNESKO-nyň işleri barada Türkiýäniň Milli toparynyň Bilim komitetiniň wise-prezidenti, professor Mustafa Sewer dagylar sanly ulgam arkaly çykyş etdiler.
Çykyşlarda Türkmenistanyň hoşniýetli goňşuçylyga, birek-birege sarpa goýmaklyga, deňhukuklylyga hem-de dünýäniň ähli döwletleri, abraýly halkara guramalary bilen özara bähbitli hyzmatdaşlyga esaslanýan Bitaraplyk syýasatynyň ähmiýeti, ýurdumyzyň oňyn daşary syýasaty netijesinde Birleşen Milletler Guramasy, onuň ýöriteleşdirilen düzümleri, hususan-da, BMG-niň bilim, ylym we medeniýet meseleleri boýunça guramasy bolan ÝUNESKO bilen netijeli gatnaşyklaryň aýratyn ähmiýet eýedigi barada bellenildi.
Maslahatyň dowamynda institutda hereket edýän «Parahatçylyk medeniýeti» atly ÝUNESKO klubynyň işjeň agzalaryna Hormat hatlar we ýadygärlik sowgatlar dabaraly ýagdaýda gowşuryldy.
Ylym-bilim ulgamy babatynda Türkmenistan bilen ÝUNESKO-nyň arasyndaky hyzmatdaşlygyň giň gerime eýe bolýandygy, ýurdumyzyň ýokary okuw mekdeplerinde we daşary ýurtlarda ÝUNESKO kafedralarynyň, klublarynyň, federasiýalarynyň hem assosiasiýalarynyň hereket etmegi we olaryň arasyndaky gatnaşyklaryň pugtalanmagy babatda döredilýän mümkinçilikler barada bellediler.
Çykyş edenler halkara hyzmatdaşlygyny has-da kämilleşdirmek, dünýäniň öňdebaryjy tejribesini öwrenmek hem okuw işine ornaşdyrmak, zehinli ýaşlary ýüze çykarmak we olaryň ylmy-medeni taslamalara gatnaşygyny artdyrmak baradaky döwlet syýasatyna laýyklykda bu maslahatyň ýokary guramaçylykly geçirilmeginiň ähmiýeti hem nygtadylar.
Halkara maslahatyň ahyrynda oňa gatnaşyjylar tarapyndan hormatly Prezidentimiz Serdar Berdimuhamedowyň adyna Ýüzlenme kabul edildi.
ORIENT
