Nyuşanyň, Hadiseniň, Murat Bozyň we Maýa Diabyň gatnaşmagynda Aşgabatda baýramçylyk konserti geçiriler
Meşhur daşary ýurtly aýdymçylaryň gatnaşmagynda uly baýramçylyk konserti 9-njy oktýabrda «Aşgabat» stadionynda geçiriler. Çäräniň başlanmagy sagat 18:00-a meýilleşdirilýär. Bu barada Aşgabat şäher häkimliginiň resmi saýtynda habar berilýär.
Tomaşaçylaryň öňünde rus aýdymçysy Nyuşa, türk ýerine ýetirijileri Hadise we Murat Boz, şeýle hem liwan aýdymçysy Maýa Diab çykyş ederler. Konsert maksatnamasynyň çäginde tanymal ýerine ýetirijileriň iň meşhur aýdymlary ýaňlanar.
Petegiň bahasy 200 manat. Olary Aşgabat şäher häkimliginiň resmi saýty we «Sanly şäher» ykjam goşundysy arkaly onlaýn satyn alyp bilersiňiz. Töleg bank karty arkaly amala aşyrylýar.
Petek satyn alnanda tomaşaçy stadion sektoryny saýlaýar, şondan soň orunlar awtomatiki ýagdaýda kesgitlenilýär. Bir bank hasabyndan bäş sany petek satyn alyp bolar.
Petekleri satyn almak boýunça jikme-jik görkezmeler Aşgabat şäher häkimliginiň resmi saýtynda ýerleşdirildi.
Guramaçylaryň belleýşi ýaly, bu konsert halklaryň arasyndaky dostlukly we medeni-ynsanperwer gatnaşyklary berkitmäge ýardam eder.
