Alymlar dünýäde iň ýuka linzany döretdiler — onuň galyňlygy bary-ýogy üç atom
Amsterdam uniwersitetiniň we Stenford uniwersitetiniň fizikleriniň ylmy toparlary taryhda iň ýuka tekiz linzany döretdiler. Onuň galyňlygy bary-ýogy 0,0000006 millimetre deň bolup, bu takmynan üç atomyň galyňlygyna deňdir. Bu innowasion iş ýeňil agramly giňeldilen hakykat äýneklerini we ykjam optiki enjamlary döretmek üçin täze mümkinçilikleri açar.
Ýagtylygy döwülme hadysasynyň hasabyna fokuslaýan adaty egri linzalardan tapawutlylykda, täze linza difraksiýa ýörelgesi esasynda işleýär. Alymlar ony wolfram disulfidinden ýasap, materialdan mikroskopik konsentrik halkalary we olaryň arasynda boşluklary emele getirdiler. Materialyň kwant häsiýetleriniň kömegi bilen linza ýagtylygy netijeli siňdirýär we täzeden şöhlelendirýär, ýagtylygyň bir bölegini aýdyň nokat görnüşindäki fokus zolagyna jemleýär.
Enjamyň esasy aýratynlygy ýagtylyk akymynyň köp böleginiň onuň içinden hiç hili üýtgemezden geçmegidir. Bu bolsa adama daş-töweregini aýdyň görmäge we şol bir wagtyň özünde şekiliň üstünde grafiki maglumatlary ýa-da sanly maglumatlary almaga mümkinçilik berýär.
Nano Letters žurnalynda barlagyň netijelerini çap eden alymlaryň bellemegine görä, bu oýlap tapyş geljegiň akylly äýnekleri we geýilýän elektron enjamlary üçin örän amatlydyr. Şeýle enjamlarda optiki durulygy saklamak bilen bir hatarda olaryň göwrümini we agramyny artdyrmazlyk möhüm talap bolup durýar.
ORIENT
