Google Japan barmaklary gymyldatmazdan ýazmak üçin konweýer görnüşli klawiaturany döretdi
Google kompaniýasynyň Ýaponiýadaky bölümi adaty bolmadyk enjamy — Gboard Conveyor Belt Version atly klawiaturany hödürledi. Gajetiň esasy aýratynlygy ulanyjynyň barmaklaryny düwmelerde hereket etdirmeli däldiginden ybarat: düwmeleriň ýerleşýän hatarlary konweýer lentasynyň ýörelgesi boýunça özleri hereket edýär.
Klawiatura dört sany üznüksiz lentadan ybarat bolup, olaryň her birinde 29 düwme ýerleşdirilendir. Ulgam çeýe çap edilen elektron platalaryň we aýlanýan barabanlaryň esasynda işleýär. Ulanyja barmaklaryny bir ýagdaýda saklamak we zerur harplar öňünden geçip barýan pursadynda olary basmak ýeterlikdir. Inženerleriň aýtmagyna görä, şeýle düşünje elleriň ýadawlygyny azaltmaga we uzak wagtlap tekst ýazmak wagtynda artykmaç hereketlerden doly dynmaga mümkinçilik berýär.
Bu taslama Google Japan-yň her ýyl gülkünç, emma doly işleýän konseptleri döretmek däbiniň dowamydyr. Öň inženerler bilelikde tekst ýazmak üçin Möbius lentasy görnüşindäki klawiatura, başgap görnüşindäki klawiatura we köne görnüşli aýlawly telefon diskine meňzeş enjam bilen IT jemgyýetçiligini haýran galdyrypdylar.
Taslamanyň 1-nji apreldäki degişme häsiýetine we ýumoristik görnüşine garamazdan, kompaniýa ähli tehniki resminamalary, 3D çap üçin faýllary we programma üpjünçiliginiň başlangyç koduny GitHub-da açyk görnüşde ýerleşdirdi. Islendik adam çyzgylary mugt ýükläp alyp, öz konweýer görnüşli klawiaturasyny öýünde ýygnap biler.
ORIENT
