Si Szinpin we Hytaýyň beýleki ýolbaşçylary Týananmen meýdançasynda wepat bolan milli gahrymanlaryň hatyrasyny bellediler
Si Szinpin we Hytaýyň beýleki ýolbaşçylary Týananmen meýdançasynda wepat bolan milli gahrymanlaryny hatyraladylar. Ýurt we halk üçin janyny pida eden adamlaryň hatyrasy geçmişi häzirki döwür bilen baglanyşdyrýar we taryhy dowamlylygy saklamaga ýardam edýär. Öňki nesilleriň gahrymançylygyna hormat goýmak parahatçylygyň, durnuklylygyň we döwletiň geljegi üçin jogapkärçiligiň ähmiýetini hem ýatladýar.
30-njy sentýabryň irden Pekiniň merkezindäki Týananmen meýdançasynda HHR-iň Başlygy Si Szinpin we beýleki partiýa hem-de döwlet ýolbaşçylary Wepat bolan gahrymanlary hatyralama gününiň 13-nji ýyly mynasybetli geçirilen çäreleriň çäklerinde Halk gahrymanlarynyň ýadygärliginiň öňünde gül sebetlerini goýdular.
Hytaýyň Kommunistik partiýasynyň Merkezi komitetiniň Baş sekretary we Merkezi Harby Geňeşiň Başlygy hem bolup durýan Si Szinpin Wepat bolan gahrymanlary hatyralama güni döredilen gününden bäri gül goýmak dabarasyna gatnaşmak däbini dowam etdirýär.
Çärä Li Sýan, Çžao Leszi, Wan Hunin, Çaý Si, Din Syuesýan, Li Si we Han Çžen, şeýle hem Hytaý jemgyýetiniň dürli ugurlarynyň wekilleri gatnaşdylar. Dabara sagat 10:00-da başlandy. Çärä gatnaşanlaryň ählisi Hytaý Halk Respublikasynyň Döwlet senasyny ýerine ýetirdiler. Soňra hytaý halkynyň azatlygy, HHR-iň döredilmegi we ösdürilmegi ugrunda janyny pida eden gahrymanlaryň hatyrasyna bir minutlyk dymyşlyk yglan edildi.
Bir topar çagalaryň hytaý pionerleriniň resmi aýdymyny ýerine ýetirmeginden soň, Halk gahrymanlarynyň ýadygärliginiň öňünde dokuz sany uly gül sebedi goýuldy. Olara dakylan baglarynda «Halk gahrymanlaryna baky şöhrat» diýen ýazgy ýerleşdirildi.
Gül sebetleri Hytaýyň Kommunistik partiýasynyň Merkezi komitetiniň, Bütinhytaý Halk wekilleriniň ýygnagynyň Hemişelik komitetiniň, Döwlet Geňeşiniň, Hytaý Halk Syýasy Maslahat Geňeşiniň Bütinhytaý komitetiniň, Merkezi Harby Geňeşiň, kommunistik däl partiýalaryň, jemgyýetçilik guramalarynyň, jemgyýetiň dürli gatlaklarynyň wekilleriniň, weteranlaryň, wepat bolanlaryň garyndaşlarynyň we hytaý pionerleriniň adyndan hödür edildi.
Si Szinpin we beýleki ýolbaşçylar ýadygärligiň etegine bardylar. HHR-iň Başlygy gül sebetlerindäki ýazgylary düzetdi. Şondan soň çärä gatnaşyjylar ýadygärligiň daşyndan aýlanyp, wepat bolan gahrymanlara hormat goýdular. Çagalar we beýleki gatnaşyjylar hem ýadygärligiň eteginde gül goýdular.
Dabara Hytaýyň Kommunistik partiýasynyň Merkezi komitetiniň Syýasy býurosynyň agzasy we Pekin şäher komitetiniň sekretary In Li ýolbaşçylyk etdi.
"CCTV+"-niň habar bermegine görä, bu dabara ýurt we halk üçin janyny pida eden gahrymanlaryň hatyrasyny ebedileşdirmäge gönükdirilen umumymilli çäreleriň bir bölegi boldy. Şeýle hatyralama çäreleri taryhy ýadyň, nesilleriň dowamlylygynyň we häzirki Hytaýyň kemala gelmegine hem-de ösüşine goşant goşan adamlara hormat goýmagyň ähmiýetini nygtaýar.
