Türkmenistanyň Prezidentiniň Ahalteke atçylyk toplumynda uly baýramçylyk dabaralary geçirildi
Türkmenistanyň Prezidenti Serdar Berdimuhamedow we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow 29-njy sentýabrda Türkmenistanyň Prezidentiniň düýpli döwrebaplaşdyrylan Ahalteke atçylyk toplumynyň dabaraly açylyşyna gatnaşdylar. 1200 aty saklamaga niýetlenen giň gerimli desga Köpetdagyň gözel dag eteklerinde ýerleşýär. Baýramçylyk çäresine ýurduň ýolbaşçy düzümi, diplomatik wekilhanalaryň we halkara guramalaryň wekilleri, meşhur atşynaslar, medeniýet işgärleri köp sanly myhmanlar gatnaşdylar.
Dabaranyň baýramçylyk ýagdaýyny sungat ussatlarynyň täsirli çykyşlary, haýran galdyryjy dron şüweleňi hem-de «Galkynyş» milli at üstündäki oýunlar toparynyň meşhur çykyşlaryny görkezdiler. Türkmenistanyň Halk Maslahatynyň Başlygy dabaranyň gatnaşyjylaryna ýüzlenip, ahalteke bedewleriniň ähli döwürlerde ösüşiň, abadançylygyň we türkmen halkynyň milli gymmatlygynyň aýdyň nyşany bolup hyzmat edýändigini nygtady. Ýurtda pudagyň kuwwatly düzümi döredildi — häzirki zaman atçylyk sport toplumlary, Aba Annaýew adyndaky Halkara atçylyk akademiýasy, ýöriteleşdirilen ylmy-önümçilik merkezi we Arkadag şäherinde Görogly adyndaky döwlet atçylyk sirki hereket edýär. Türkmenistanyň Garaşsyzlygynyň 35 ýyllygy mynasybetli durky düýpli täzelenen toplumyň açylmagy «Garaşsyz, baky Bitarap Türkmenistan — bedew batly at-myradyň» diýen ýylyň şygaryna aýratyn öwüşgin berýär.
Täze toplum atlary saklamagyň ýokary standartlaryny öňdebaryjy ylmy işläp taýýarlamalar bilen utgaşdyrýar. Onuň çäginde seçgiçilik we tohumçylyk işleri üçin sanly ulgamlar we barlaghanalar bilen enjamlaşdyrylan binalar, açyk we ýapyk manejler, konkur üçin meýdança, suw türgenleşdirijileri, at çapyşyklary üçin ýodalar we tomaşaçylaryň münberleri hereket edýär. Dolandyryş binasynda atlaryň iýmitlenşine, fiziologik görkezijilerine we saklanyş tertibine gözegçilik etmäge mümkinçilik berýän sanly gözegçilik ulgamy ornaşdyryldy.
Üpjünçilik infrastrukturasynyň gerimi hem täsir galdyrýar: bu ýerde bedewleri iýmitlendirmek üçin ýorunja ekin meýdanlary, ýörite ekilen alma baglary we käşir ekilen meýdanlary bar. Toplumy dört paslyň giň gerimli bezegleri we tebigy görnüşleri bilen ýöriteleşdirilen fotosurat studiýasy hem üstüni ýetirýär. Desganyň binagärlik toplumyny baş girelgedäki «Atly ýigit» heýkel kompozisiýasy we merkezi bölegindäki, ahalteke tohumynyň köp asyrlyk ýoluny alamatlandyrýan ýadygärlikler bezeýär.
Toplumyň çägi bilen taňyşlygyň dowamynda türkmen halkynyň Milli Lideri Hytaýyň «Daqing Huiyou Breeding Co., Ltd.» kompaniýasynyň ýolbaşçysy Liu Şutsine mele reňkli Dosthan atly ahalteke bedewini sowgat berdi.
Soňra Prezident Serdar Berdimuhamedow Türkmenistanyň Prezidentiniň Ahalteke atçylyk toplumynyň çägine geldi. Bu ýerde dowlet Baştutany baş girelgäniň toý bagyny kesdi, athanalarda atlaryň saklanyş şertleri bilen tanyşdy we ýapyk manežde konkur boýunça türgenleriň görkezme çykyşlaryna tomaşa etdi.
Baýramçylygyň esasy wakalary türkmen halkynyň Milli Lideriniň badalga beren 35 atlynyň dabaraly ýörişi, şeýle hem ussat çapyksuwarlaryň baýramçylyk at çapyşyklary boldy. Uzak aralykdaky gyzgalaňly bäsleşikleriň ýeňijisi türkmen halkynyň Milli Lideri, Türkmenistanyň halk atşynasy, Türkmenistanyň ussat halypa çapyksuwary Gurbanguly Berdimuhamedowyň çapan Daghan atly ahalteke bedewi boldy. Bedewi ýaryşa ýaş seýis Kerimguly Berdimuhamedow tarapyndan taýýarlanyldy.
Türkmen halkynyň Milli Lideriniň kararyna laýyklykda birinji orun üçin baş baýragy — Range Rover Sport awtoulagy — Goranmak ministrligine, seržant Kerimguly Berdimuhamedowyň gulluk edýän harby bölümine sowgat berildi. Ikinji orny T.Pirmyradowyň çapan Şöhratly atly bedewi eýeledi, oňa Toyota Fortuner awtoulagynyň çarary gowşuryldy. Üçünji orun bolsa H.Aşyrowyň çapan Azamat atly bedewi eýeläp, oňa Toyota Camry awtoulagynyň açary gowşuryldy.
Dabaralar welaýatlaryň milli däp-dessurlarynyň görkezilişi, göreş boýunça ýaryşlar we türkmen alabaýlarynyň gözellik bäsleşigi bilen dowam etdi. Bäsleşikde «Arwana» atly türkmen alabaýy ýeňiji boldy, onuň eýesi Toyota Corolla awtoulagy bilen sylaglandy.
Baýramçylyga aýratyn öwüşgin beren wakalaryň biri hem toý kerweni — kejebäniň gelmegi boldy. Prezident Serdar Berdimuhamedow ýaşlary durmuş toýlary bilen gutlap, olara toý sowgady hökmünde täze jaýyň açaryny gowşurdy.
